Երբ որոշում կայացվի, ես 80 տարեկան կլինեմ. Մոուրինյուն՝ «Մանչեսթեր Սիթիի» կողմից Անգլիայի Պրեմիեր լիգայի ֆինանսական կանոնները խախտելու գործընթացի մասին

Մադրիդի «Ռեալի» գլխավոր մարզիչ Ժոզե Մոուրինյուն իրեն բնորոշ սուր հումորով ու հեգնանքով է անդրադարձել «Մանչեսթեր Սիթիի» կողմից Անգլիայի Պրեմիեր լիգայի ֆինանսական կանոնները խախտելու աղմկահարույց գործընթացին:

«Ես կնախընտրեի պարզապես ծիծաղել այս ամենի վրա։ Կարծում եմ՝ մենք ինչ-որ հանգուցալուծման կհասնենք, բայց քանի որ ես արդեն 60-ն անց եմ, ինձ մեծ հաջողություն կպահանջվի, որպեսզի ողջ մնամ մինչև վերջնական դատավճիռը։ Քանի որ նախ կկայացվի որոշումը, իսկ հետո կսկսվի բողոքարկման գործընթացը… Այդ ժամանակ ես արդեն 80 տարեկան կլինեմ»,-պորտուգալացի մասնագետի խոսքերը մեջբերում է Corriere dello Sport-ը:

Անգլիայի Պրեմիեր լիգան «Մանչեսթեր Սիթիին» մեղավոր է ճանաչել 2009-ից 2018 թվականների ընթացքում ֆինանսական կանոնների լուրջ խախտումների մեջ: Մեղադրանքները վերաբերում են ֆինանսական ոչ հավաստի տեղեկատվության տրամադրմանը, ֆուտբոլիստներին ու մարզիչներին կատարված վճարումների քողարկմանը, ինչպես նաև ֆինանսական վերահսկողության պահանջների չպահպանմանը:

«Քաղաքաբնակներին» սպառնում են ամենախիստ պատժամիջոցները՝ միավորների զրկումից ու նախկին տիտղոսների չեղարկումից մինչև Պրեմիեր լիգայից հեռացում: Հատկանշական է, որ եթե «Մանչեսթեր Սիթիին» հետին թվով զրկեն չեմպիոնական տիտղոսներից, ապա Ժոզե Մոուրինյուն կարող է իր մարզչական ակտիվում գրանցել ԱՊԼ-ի ևս մեկ չեմպիոնություն. 2017/18 մրցաշրջանում նրա գլխավորած «Մանչեսթեր Յունայթեդը» մրցաշարային աղյուսակում զբաղեցրել էր երկրորդ հորիզոնականը՝ զիջելով միայն «Սիթիին»: