«Կինոն քեզ ցույց են տալիս, իսկ թատրոնը դու ես նայում». Արթուր Ութմազյան

Այսօր թատրոնի համաշխարհային օրվա հետ կապված Հայաստանի ժողովրդական արտիստ, դերասան Արթուր Ութմազյանը լրագրողների հետ հանդիպմանը ասաց, որ թատրոնը եղել է, կա և միշտ կլինի:

Ութմազյանը հիշեցրեց, որ երբ ստեղծվեց կինոմատոգրաֆիան բոլորը ասում էին որ թատրոնը կմեռնի, հետո ստեղծվեց հեռուստատեսությունը, նորից նույնն էին ասում։ Թատրոնը կա նաև համացանցի ժամանակաշրջանում:

«Թատրոնը ոչ մի բանի հետ փոխարինել չի կարելի: Այստեղ կա կենդանի շփում և այդ շփումը անհնար է որևէ բանի հետ համեմատել: Կինոն քեզ ցույց են տալիս, իսկ թատրոնը դու ես նայում: Դու ես որոշում՝ բեմի որ անկյունը նայես»,- ասաց նա:

Արթուր Ութմազյանը նաև ասաց, որ, ցավոք, այսօր մեր երկրում ով ուզում որոշում է, որ ինքը կարող է դերասան դառնալ: «Երկու մասնագիտություն կա՝ մեր երկրում կամ դեպուտատ են դառնում կամ դերասան: Ցավալի է, բայց փաստ: Այսօր ամեն օր հեռուստատեսությամբ կարելի է տեսնել նոր երգի պրեմիերայի, բայց ներկայացման պրեմիերայի մասին անդրադարձ հազվադեպ կտեսնես, այն էլ միայն շոու-բիզնեսի լուրերի շրջանակում»,- ասաց նա:

Երևանի Հ.Ղափլանյանի անվան թատրոնի պետական դրամատիկական թատրոնի թատերախմբի վարիչ, դերասան Հովհաննես Թեքգյուզյանն իր հերթին նշեց, որ իր համար թատրոնը տոն է՝ անկախ նրանից, թե ինչ ժանրի ստեղծագործություն է խաղում:

«Հանդիսատես և դերասան կապը ինձ համար շատ կարևոր է: Ես չեմ հավատում կատարսիսին, բայց, այն լինելով կենդանի արվեստ և երբ չի կարողանում նրա հետ դիալոգի մեջ մտնել, ստեղծվում է հետաքրքիր կապ: Ինձ համար ամենաթանկը հենց այդ կապն է, որը ներքին մենախոսության է բերում»,- ասաց նա: