Եգիպտոսում հայտնաբերվել են հնագույն պապիրուսներ և նավահանգիստ (լուսանկարներ)

Եգիպտոսում՝ Սուեզի մերձակայքում, եգիպտացի և ֆրանսիացի գիտնականների խումբը հայտնաբերել է 4-րդ արքայատոհմի շրջանի փարավոններից Քեոփսի ժամանակների առևտրային նավահանգստի հետքեր: Վերջինս թվագրվում է մ.թ.ա 2.580 թ-ով:

Հայտնաբերվել է նաև 40 հնագույն գրավոր զեկույց, հայտնում է Russia Today-ը: Գիտնականների կարծիքով՝ ամենահին պապիրուսները կօգնեն շատ բան պարզել տվյալ շրջանի եգիպտացիների կենցաղի մասին: Դրանցում ամենամսյա տվյալներ կան նավահանգստի գործունեության մասին, թե քանի մարդ է ներգրավված եղել աշխատանքներում և ով ինչ պարտականություններ է ունեցել: Գրությունները կատարել է ոմն հին եգիպտացի պաշտոնյա՝ Մերեր անունով: Նա մասնակցել է նաև Մեծ բուրգերի շինարարությանը: Չնայած բուրգերի կառուցման մասին բացառիկ պապիրուսում ոչ մի նորություն չկա:

Այժմ փաստաթղթերն ուսումնասիրում են թանգարանային մասնագետները: Իսկ նավահանգիստը կարևոր հանգույց է եղել Կարմիր ծովում: Այնտեղ քարե խարիսխների ու նավերի ճոպանների մեծ հավաքածու է հայտնաբերվել: Նույն տեղում գիտնականները 30 անձավ են հայտնաբերել, որոնց մուտքերը փակված են եղել քարե բլոկներով: