Պատգամավորն առաջարկելու է Արմավիրի մարզը ճանաչել աղետի գոտի. վնասը կազմում է մոտ $70 մլն

Արմավիրի մարզի թիվ 21 ընտրատարածքից ընտրված պատգամավոր, ԱԺ «Հանրապետական» խմբակցության պատգամավոր Ալիկ Պետրոսյանը Կառավարությանն առաջարկելու է, որպեսզի կարկտահարությունից տուժած Արմավիրի մարզը դիտարկվի որպես աղետի գոտի:
 

Այս մասին Tert.am-ին հայտնած Ալիկ Պետրոսյանը նշեց նաև Արմավիր մարզի համար բացվելիք բանկային հատուկ հաշվեհամարի անհրաժեշտությունը, որպեսզի սփյուռքից, Հայաստանից, Արցախից գումարներ փոխանցվեն։ Բացի դրանից, նա առաջարկում է աղետի մասին տեղեկացնել բոլոր դոնոր կազմակերպություններին, բարեգործներին, բարերարներին, տարբեր տեսակի հիմնադրամներին՝ օգնության ակնկալիքով:

ՀՀԿ-ական պատգամավորի հաշվարկներով ու նրա տրամադրության տակ եղած տվյալներով՝ Արմավիրի մարզի 43 գյուղերը 60-70 միլիոն դոլարի վնաս են կրել:
 

«Սա մեծ դժբախտություն ասենք, ողբերգություն ասենք, արհավիրք բնության ասենք, աղետ ասենք … հիմա եղել ա, բնություն ա: 88–ի երկրաշարժը, որ եղավ, տենց երկրաշարժ եղե՞լ էր: Հիմա, էս կարկուտը, որ եղավ, ընդհանրապես, նման կարկուտ չի եղել Արմավիրի մարզում: Չի եղել»,– ասաց նա:
 

«Ո՞նց ձեզ բացատրեմ: 2010 թվին, որ եղավ, էլի ուժեղ էր, բայց մասնակի էր վնասվել, էս անգամ 100 տոկոսով ոչ մի բան չի մնացել»,-ասաց պատգամավորը՝ նշելով, որ կարկտի ուժգնությունն այնքան ուժեղ էր, որ ցելոֆաններով ծածկված ձմերուկի բերքը մտել էր հողի տակ՝ հարվածների ուժգնությունից:
 

Նշենք, որ երեկ Արմավիր-Երևան ճանապարհը փակած արմավիրցիներից Արևիկ համայնքի գյուղապետն ասել էր, որ գյուղացիների 90 տոկոսը բերքը ցանել է վարկով, և յուրաքանչյուր 5 հոգանոց ընտանիքում 4–ը վարկ են վերցրել:


Ալիկ Պետրոսյանը ևս տիրապետում է նման թվերի և որպես օրինակ նշեց, որ միայն Արմավիրի Նալբանդյան գյուղը 1 միլիոն դոլարի վարկ է վերցրել:

«Ինձ չի թվում, որ մեր երկիրն էսօր էդ հնարավորությունն ունի, որ միահատույց օգնություն հատկացնի, բայց փոխարինող ձևեր կան: Ես խոսել եմ գյուղացիների հետ և նրանք ի՞նչ են ուզում. վարկերը սառեցվեն, անտոկոս վարկեր, ջրի, հողի հարկի ազատում և սառեցրած վարկերի տոկոսները չմարելը: Երեկ վարչապետը հայտարարեց, որ հավաքվել են բոլոր տվյալները, ինձ թվում է՝ վաղը կառավարության նիստին կհայտնեն, թե ինչ չափով են փոխհատուցելու»,- ասաց պատգամավորը՝ ավելացնելով, որ գոնե այս կետերից մի քանիսը պետք է անպայման լինեն:
 

Կարկտահարության հետևանքների քննարկման համատեքստում նաև քննարկվում է, թե ի վերջո, հակակարկտային կայանները գործի դրվե՞լ են, թե ոչ, և եթե ոչ, ապա ինչի՞ համար են Արմավիր մարզում գործող 102 հակակարտային կայանները:
 

Հանրապետական պատգամավորն ասաց, որ կրակել են, բայց կարկտահարությունն այնպիսին է եղել, որ «ուզում ա երկու անգամ շատ կրակեին, տասն անգամ քիչ», մեկ է՝ լինելու էր այն, ինչ եղավ: Այսինքն՝ այդ կարկուտին ոչինչ չէր օգնի:
 

«Էդ սարքը սկի իրեն չկարողացավ օգնել. կարկուտն էնքան էր լցվել մեջը, չէր կարողանում կրակել: Ինչքան լցվի մեջը, որ չկրակի»,- ասաց պատգամավորը:
 

Ալիկ Պետրոսյանը անլուրջ է համարում խոսակցությունները, թե հակակարկտային կայանները գործել են «դիվերսիֆիկացված», քանի որ որոշ պաշտոնյաներ այդ տարածքներում ունեցել են հողեր, որոնք և պաշտպանվել են՝ ամպերը այլ տարածքների վրա ցրելու հաշվին:

Հանրապետական պատգամավորը նշեց, որ ինքը ևս 70 հեկտար խաղողի տարածք է ունեցել և իր կորուստն էլ կազմում է մոտ 400 հազար ԱՄՆ դոլար: Ըստ որում, Ալիկ Պետրոսյանի տեղեկացմամբ, կարկտահարության վնասը միայն այս տարվանով չի սահմանափակվելու:
 

«Բաց վերք տեսե՞լ եք, վերքը որ բաց լինի, ի՞նչ կլինի, եթե չկապես: Ինֆեկցիա կանցնի չէ՞, նույնն էլ էս կարկտահարության դեպքում.ինֆեկցիա է անցնում, ու այգին մի քանի տարում չորանում է»,- ասաց պատգամավորը՝ ավելացնելով, որ Կոնկրետ իր խաղողի այգում ինքը հաջորդ բերք սպասում է 3 տարի անց։