Յանուկովիչը թվել է պայմանները, որոնց դեպքում կստորագրեն ԵՄ-ի հետ Ասոցացման համաձայնագիրը. ԵՄ-ն արձագանքել է (թարմացված)
Ուկրաինայի նախագահ Վիկտոր Յանուկովիչը նշել է նախապայմանները, որոնց դեպքում Կիևը պատրաստ կլինի Եվրամիության հետ Ասոցացման համաձայնագրի ստորագրմանը, տեղեկացնում է ИТАР-ТАСС գործակալությունը։
Դրանցից կարևորն Ուկրաինայի, Ռուսաստանի և Մաքսային միության այլ անդամների միջև հակասությունների վերացումն է, որոնց ձեռնտու չէ Ուկրաինայի և ԵՄ-ի միջև ազատ առևտրի գոտու ստեղծումը։ «Շնորհակալ կլինեի ձեզ Ուկրաինա-ԵՄ-Ռուսաստան ձևաչափով համագործակցության համար»,-հայտարարել է Յանուկովիչը։
Դրան զուգահեռ՝ նա հույս է հայտնել, որ Եվրամիության առևտրային սահմանափակումները կվերանայվեն։
Յանուկովիչը նաև ԵՄ-ին խնդրել է Ուկրաինային ֆինանսատնտեսական օգնություն տրամադրելու ծրագիր մշակել։
16.14 Եվրամիությունը հրաժարվել է փոխել իր պայմաններն Ուկրաինայի հետ Ասոցացման համաձայնագրի շուրջ բանակցություններում, տեղեկացնում է lenta.ru-ն։ Այդ մասին հայտարարել է ԵՄ-ում նախագահող Լիտվայի նախագահ Դալյա Գրիբաուսկայտեն։
«ԵՄ-ն Ուկրաինայի հետ որևէ գործարքի կամ դավադրության չի գնա»,-ասել է Լիտվայի նախագահը։ Նա նշել է, որ ուկրաինական իշխանությունները պետք է փոխեն իրենց մոտեցումը։
Բացի այդ, Բրյուսելը մտադիր չէ Կիևի հետ բանակցություններում ներառել նաև Մոսկվային. այդ մասին հայտարարել է Եվրահանձնաժողովի ղեկավար Ժոզե Մանուել Բառոզուն։ «Երբ մենք պայմանավորվում ենք երկկողմ համաձայնագրի մասին, մենք պետք է համաձայնվենք, որ դա երկկողմ գործ է»,-ասել է նա։










