Խորվաթների երկու երրորդը հանրաքվեի ընթացքում դեմ է քվեարկել միասեռ ամուսնություններին

09:30 • 02.12.13

Խորվաթիայում կիրակի օրը կայացած ամուսնության հասկացության սահմանադրական սահմանման հարցի վերաբերյալ հանրաքվեում ընտրողների գրեթե երկու երրորդը՝ 65,75 տոկոսը, դեմ է քվեարկել միասեռ ամուսնություններին: Նման միությունների օգտին է քվեարկել հանրաքվեի մասնակիցների 33,89 տոկոսը: Ինչպես հաղորդել է Ընտրական հանձնաժողովը՝ հաշվարկվել է ձայների 99,51 տոկոսը, հայտնում է ԻՏԱՌ ՏԱՍՍ-ը։

 

Ընտրողներին առաջարկվում էր ասել «այո» կամ «ոչ», որպեսզի սահմանադրության մեջ «ամուսնություն» հասկացությունը բնութագրվի միայն որպես տղամարդու և կնոջ միջև միություն: Ընտրական իրավունք այդ հանրաքվեում ուներ մոտ 3,8 միլիոն մարդ, սակայն մասնակցել է նրանց միայն 38 տոկոսը:

 

Հանրաքվեն «Ընտանիքի անունից» շարժման նախաձեռնությունն էր, որը հավաքել էր մոտ 750 հազար ստորագրություն, ինչպես նաև ստացել կաթոլիկ եկեղեցու և Խորվաթիայի աջ քաղաքական կուսակցությունների աջակցությունը: Վերջին մի քանի ամիսներին երկրում բուռն հասարակական քննարկումներ էին տեղի ունենում այդ թեմայով:

 

Երկրի նախագահ Իվո Իոսիպովիչն իր հիասթափությունն է հայտնել հանրաքվեի արդյունքների վերաբերյալ, չնայած նշել է, որ դրանք կանխատեսելի են եղել: