Ուկրաինայի ընդդիմադիր խմբակցությունները պահանջում են կառավարության հրաժարականը
Ուկրաինայի ընդդիմադիր 3 խմբակցություններ պահանջում են երկրի կառավարության հրաժարականը՝ վարչապետ Նիկոլայ Ազարովի գլխավորությամբ, տեղեկացնում է ИТАР-ТАСС գործակալությունը։
Այդ մասին խորհրդարանում հայտարարել են Արսենի Յացենյուկը, Վիտալի Կլիչկոն և Օլեգ Տյագնիբոկը։
«Դա մեր առաջին պահանջն է։ Երկրորդ պահանջը քաղաքական ճնշումների դադարեցումն է, այսինքն՝ Յուլյա Տիմոշենկոյի և Կիևում ակցիաների ընթացքում ձերբակալված երեք ակտիվիստների ազատ արձակումը»,-ասել է «Բատկիվշչինա» խմբակցության ղեկավար Արսենի Յացենյուկը։
Նա մերժել է խորհրդարանի խոսնակ Վլադիմիր Ռիբակի նախաձեռնությունը՝ երկրում ստեղծված իրավիճակը կլոր սեղանի շուրջ քննարկելու վերաբերյալ։
«Մենք արդեն կլոր սեղանի շուրջ նստել ենք, երբ պայմանավորվել էինք ընդունել ինտեգրման մասին օրենքը»-ասել է նա։
Դրանով պայմանավորած՝ ընդդիմության առաջնորդները նպատակահարմար չեն համարում շարունակել նիստին մասնակցությունը։ «Մենք գնում ենք Մայդան, քանի որ այնտեղ շատ աշխատանք կա անելու»,-ասել է ընդդիմադիր գործիչը։
Նա տեղեկացրել է, որ մոտ ապագայում ընդդիմադիրները կհանդիպեն Ուկրաինայում հավատարմագրված դեսպանների հետ։










