Չեմ մտածել թոշակի մասին. երիտասարդ ՀՀԿ-ական պատգամավորները կուտակային համակարգից կամավոր չեն օգտվել
Կուտակային կենսաթոշակների համակարգից մինչ այսօր կամավոր սկզբունքով չեն օգտվել Ազգային ժողովի «Հանրապետական» խմբակցության երիտասարդ պատգամավորներից Արփինե Հովհաննիսյանը, Կարեն Ավագյանը, Հովհաննես Սահակյանը, Էդուարդ Շարմազանովը, ովքեր նոր օրենքով պարտադիր պետք է կուտակեն: Tert.am-ի հարցին ի պատասխան՝ նրանք ասացին, որ հիմնական պատճառը երիտասարդ լինելն է, չեն մտածել թոշակի մասին:
«Չեմ օգտվել մինչ այս պահը, երևի ինչ-որ առումով տարիքային առանձնահատկությունից ելնելով՝ ինքս չեմ մտածել այդ համակարգից օգտվելու մասին»,-ասաց Արփինե Հովհաննիսյանը:
Կարեն Ավագյանը նույնպես կամավոր չի օգտվել կուտակային համակարգից: «Ընդանրապես՝ երբ նման հարցերը դրվում են կամավորության սկզբունքով, հիմնականում՝ դա չի գործում, հատկապես՝ մեր տարիքի մարդկանց համար, որովհետև մեր տարիքային խմբի համար երևի այդքան էլ հասկանալի չէ, որ պետք է կամավոր մտածել՝ էսօր գումար դնել թոշակի տարիքում գումար ստանալու համար»,-ասաց նա:
Պատգամավորի կարծիքով, այնուամենայնիվ, պետք է կուտակել, որպեսզի քաղաքացին հետագայում պետության համար բեռ չդառնա. «Դրանից առաջ էլ էինք կուտակում, կգումարվի նաև հինգ տոկոս պարտադիրը, որը հետագայում մեծ գումար կկազմի»:
Հովհաննես Սահակյանը նույնպես կամավոր չի կուտակել: «Քանի որ համեմատած՝ ավելի երիտասարդ եմ, թոշակի մասին դեռևս չեմ մտածել, հայի բնավորություն է»,-նշեց նա:
ՀՀԿ խոսնակ Էդուրադ Շարմազանովն էլ ասաց, որ կամավորից չի օգտվել, բայց պարտադիրից կօգտվի: Իսկ համակարգի վերաբերյալ նկատեց. «Ես՝ որպես քաղաքացի, իմ դիրքորոշումը հայտնել եմ 2012թ.-ի դեկտեմբերի 22-ի քվեարկությամբ, երբ բոլոր պատգամավորները կողմ էին այդ նախագծին, միակ դեմ քվերակողը եղել է Վիկտոր Դալլաքյանը: Եվ խորհուրդ կտայի բոլորին՝ տարին մեկ անգամ կարծիք չփոխել»:
Նրա կարծիքով՝ դա այն բարեփոխումն է, որի դրական արդյունքները հետո´ կտեսնեն: «Այն, որ այդ բարեփոխումն ավելի լավն է, քան՝ ներկայիս համակարգը, փաստ է»,-ասաց Շարմազանովը:










