ՀՔԾ-ում Վարդան Պետրոսյանի գործով քննիչի դեմ նյութեր են նախապատրաստվում. Նիկոլայ Բաղդասարյան
Դերասան Վարդան Պետրոսյանի մասնակցությամբ ավտովթարի գործով քննիչ Հայկ Հակոբյանի նկատմամբ Հատուկ քննչական ծառայությունում նյութեր են նախապատրաստվում՝ ծառայողական լիազորությունները չարաշահելու կասկածանքով, Tert.am-ին այս մասին տեղեկացրեց Վարդան Պետրոսյանի փաստաբան Նիկոլայ Բաղդասարյանը:
Նա նշեց, որ այսօր առավոտյան ժամը 10-ից մինչև 18-ը Վարդան Պետրոսյանը ՀՔԾ-ում հարցաքննության է ենթարկվել:
«Նյութերի նախապատրաստումը Մարդու իրավունքների պաշտպանի դիմումի հիման վրա է սկսվել: Վարդան Պետրոսյանին բավականին երկար ու մանրամասն հարցաքննեցին՝ կապված այն բանի հետ, թե ինչ է տեղի է ունեցել այն օրերին, երբ Հայկ Հակոբյանը հարցաքննել է դերասանին: Հուսով ենք, որ գործին ընթացք կտրվի»,- ասաց նա:
Նիկոլայ Բաղդասարյանն ընդգծեց, որ եթե հաստատվի այն հանցակազմը, որը, ըստ ՄԻՊ-ի, առկա է եղել քննիչի գործողություններում, ապա 10-օրյա ժամկետում նրա նկատմամբ քրեական գործ կհարուցվի:
«Հարցաքննող քննիչն էլ էր զարմացած, որ նման ապօրինություններ են արել և հայտնի չէ, թե ինչի համար»,- ասաց նա:
Հիշեցնենք, որ հոկտեմբերի 20-ին Եղվարդ-Երևան ճանապարհին դերասան Վարդան Պետրոսյանի վարած «ԲՄՎ-320» մակնիշի մեքենան բախվել էր «Վազ 2121» մակնիշի մեքենային: Վթարի հետևանքով՝ «Վազ 2121» մակնիշի մեքենայի ուղևորներ Էդգար և Էդուարդ Հակոբյանները մահացել էին:
Վարդան Պետրոսյանին մեղադրանք էր առաջադրվել՝ ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»:










