Մաքսային միությանն անդամակցության պայմանագիրը Դավիթ Հակոբյանը համեմատում է Թուրքմենչայի և Գյուլիստանի պայմանագրերի հետ
Մարքսիստական կուսակցության նախագահ Դավիթ Հակոբյանը թեև դեմ չէ, որ Հայաստանն անդամակցի Մաքսային միությանը, սակայն, ըստ նրա, դեմոկրատիան պահանջում էր, որպեսզի նման որոշում կայացնելուց առաջ իշխանությունները հաշվի նստեին հասարակության կարծիքի հետ: Այս մասին նա այսօր հայտարարեց լրագրողների հետ հանդիպմանը:
«Մաքսային միությանն անդամակցության պայմանագիրը ես համեմատում եմ Թուրքմենչայի և Գյուլիստանի պայմանագրերի հետ։ Ամենակարևորն այդ պայմանագրի մեջ այն է, որ կփոխվի արցախյան հարցի լուծման դիվանագիտական դոկտրինան: Ահա այստեղ է, որ հարցը կրկին պետք է դրվի ռեֆերենդումի՝ արցախահայությունն ուզում է միանալ Հայաստանի՞ն, թե՞ Արցախը հռչակել անկախ պետություն կամ գուցե ուզում են, որ Արցախը դառնա Ռուսաստանի ներքին քաղաքական սուբյե՞կտ»,-ասաց նա:
Նա ընդգծեց, ոոր այս երեք սկզբունքներից թե որը կընտրի արցախահայությունը, իր խնդիրն է, բայց ՀՀ Ազգային ժողովը մեկ գերխնդիր ունի. «Իր որոշմամբ պարտադրել Հայաստանին դուրս գալ բանակցային գործընթացից` տեղը զիջելով Արցախին: Քեթրին էշթոնների և եվրոպացի այրերի հետ պաչպռոշտիների ժամանակներն անցել են»,-ասաց նա:
Մարքսիստն անդրադարձավ նաև իշխանափոխության հարցերին և ընդգծեց, որ իր կարծիքով հեղափոխական ուժեր Հայաստանում կան և լիդերներ անպայման կծնվեն։ «Եթե իշխանափոխության համար նոր լիդեր չլինի, ես կամ ու կամ»,- ասաց նա։
Մարքսիստի դիտարկմամբ` լավ կլինի, որ իշխանափոխությունը լինի վերևից` նոր պառլամետնական ընտրությունների անցկացում, նոր կառավարության ձևավորում:
«Եթե իշխանափոխություն լինի ներքևից, ապա դա կլինի ծանր քաղաքական կատակլիզմա, որը Հայաստանը կդարձնի հերթական արյունոտ թատերաբեմ,-ասաց նա և հավելեց,-խորհրդարանական այն չորս քաղաքական ուժերը, որոնք իրենց ընդդիմադիր են հայտարարում, պետք է վայր դնեն մանդատները, իսկ եթե ոչ, ուրեմն զբաղված են դատարկ քաղաքական ֆլիրտով»:










