Կարեն Անդրեասյանը չարաչար սխալվում է, դատական համակարգում չկան կաշառքի սակագներ. Ռուբեն Սահակյան
ՀՀ փաստաբանների պալատի նախկին նախագահ Ռուբեն Սահակյանը «հիմարություն» բառով որակեց ՀՀ ՄԻՊ –ի՝ արդար դատաքննության իրավունքի վերաբերյալ արտահերթ զեկույցում արված անդրադարձը, որտեղ նշված են նաև՝ դատական կաշառքի սակագները:
Tert.am-ի հետ զրույցում ՀՀ ՓԲ նախկին նախագահը նշեց.«Հիմարություն… ինչ-որ մեկն ընդհանրապես առնչություն չունի համակարգի հետ: Տենց բան գոյություն չունի, որ տաքսաներ լինեն: Էսօր նախ՝ հավատացեք, որ կաշառքը շատ հազվադեպ երևույթ է»:
Հիշեցնենք, որ ներկայացվում էր, թե կաշառքի չափը որոշվում է՝ հայցագնի 10%-ից ելնելով: Ընդհանուր առմամբ՝ հարցվածների մեծ մասի պնդմամբ՝ կաշառքի սակագները տատանվում են հետևյալ միջակայքերում. Առաջին ատյանում՝ 500-10.000 դոլար, Վերաքննիչ դատարանում՝ 2000-15.000 դոլար, Վճռաբեկ դատարանում՝ 10.000-50.000 դոլար:
Պնդելով վերը նշված կարծիքը՝ Ռուբեն Սահակյանն ասաց, որ անգամ կուզեր, որ երբեմն՝ կաշառքով «գործ արվեր»՝ այն նկատառմամբ, որ երբ ճշմարտությանը չես հասնում, գուցեև օգնի կաշառքը:
Ի պատասխան հարցի, թե զեկույցի այս հատվածում զետեղված են գիտակ շրջանակներում անցկացված հարցումները, և որ դա մեկ հոգու կարծիք չէ, Ռուբեն Սահակյանը նորից բարկացավ և պնդեց.« Դա հիմարություն է: Ցանկացած փաստաբան եփվում է այս ամենի մեջ և շատ ավելի ինֆորմացված է, քան՝ մեկ այլ անձ: Ասել, որ այսինչ ատյանում այսպիսի գնացուցակ գոյություն ունի, այնինչում՝ այսքան, ուրեմն՝ Կարեն Անդրեասյանը չարաչար սխալվում է»:
Ինչ վերաբերում է հարցին, թե այդ դեպքում՝ ինչ-որ դրդապատճառներ տեսնու՞մ է, պարոն Սահակյանն ասաց՝«Չգիտե´մ, չգիտե´մ»:
ՓԲ նախկին նախագահը բացառում է, որ իր գնահատականի կտրուկ և ժխտողական լինելը պայմանավորված լինի նրանով, որ կաշառքների այս համակարգի դեպքում հարցականի տակ է դրվում փաստաբանական գործունեությունը՝ որպես այդպիսին:
«Միանշանակ՝ ո´չ, ով նման կարծիք ունի, ընդհանրապես՝ հեռու է համակարգից. գիշերը քնել է, ինչ-որ բան է «դուրս բերել» և այդ «խաբարը» տարածվել է»,-ավելացրեց Ռուբեն Սահակյանը:










