Ուրուգվայն ամբողջությամբ օրինականացրել է մարիխուանան
Ուրուգվայի Կոնգրեսը երկարատև քննարկումներից հետո, 16 կողմ, 13 դեմ ձայների հարաբերակցությամբ հավանության է արժանացրել մարիխուանայի աճեցումն ու վաճառքը թույլատրող օրինագիծը, հայտնում է Лента-ն՝ Reuters-ին հղումով։
Ըստ այդմ՝ երկրի քաղաքացիներին թույլատրվում է մարիխուանա օգտագործել, գնել ու աճեցնել ոչ առևտրային նպատակներով։ Բայց բույսի առևտրային նպատակով աճեցումը ևս հնարավոր է՝ միայն, եթե դա արվի կառավարության վերահսկողության ներքո։
Օրինական մարիխուանայի 1 գրամն Ուրուգվայում կարժենա 1 դոլար, ինչը փողոցային գներից ավելի ցածր է։ Ամեն ամիս յուրաքանչյուր չափահաս ուրուգվայցի կկարողանա գնել մինչև 40 գրամ մարիխուանա, որը վաճառվելու է դեղատներում։ Սակայն օրենքն արգելում է մարիխուանա վաճառել արտասահմանցիներին։
Ուրուգվայում մարիխուանայի օրինականացման գաղափարի հեղինակն է նախագահ Խոսե Մուխիկան։
Օրենքն ուժի մեջ մտնելուց հետո, Ուրուգվայը կդառնա աշխարհում առաջին պետությունը, որտեղ մարիխուանան ամբողջությամբ է օրինականացված։










