Արամ Սարգսյանն ու Սեյրան Օհանյանը չեն էլ պատկերացնում, որ Մանվել Գրիգորյանից բացի ուրիշ մեկը կլինի ԵԿՄ նախագահ. Վ. Վարդանյան

21:20 • 16.12.13

Երկրապահ կամավորականների միության 37 հազար անդամներն անխտիր միայն Մանվել Գրիգորյանին են տեսնում վարչության նախագահի պաշտոնում, այդ թվում՝ Սեյրան Օհանյանը և Արամ Սարգսյանը: Tert.am-ի հետ զրույցում այսպիսի տեսակետ հայտնեց ԵԿՄ վարչության նախագահի խորհրդական Վարդան Վարդանյանը՝ անդրադառնալով «Հրապարակ» օրաթերթում հրապարակված հոդվածում պնդմանը, թե փետրվարյան համագումարին ընդառաջ ԵԿՄ-ում խմորումները շարունակվում են:

 

Նշենք, որ հրապարակման մեջ զետեղված էր տեղեկատվություն, թե ԵԿՄ նախագահի ընտրությունը կրկին ալեկոծել է «Երկրապահին», որն առանց այն էլ բազում թևեր ունի՝ գեներալ Մանվելի, Արամ Սարգսյանի, Սեյրան Օհանյանի:

 

«Ե՛վ Արամ Սարգսյանը, և՛ Սեյրան Օհանյանը երևի չեն պատկերացնում, որ Մանվել Գրիգորյանից բացի ուրիշ մեկն այսօր կարող է լինել ԵԿՄ վարչության նախագահը: Արամ Սարգսյան և Սեյրան Օհանյանը հայրենիքին նվիրված, ազնիվ մարդիկ են ու շատ ջերմ հարաբերություններ ունեն ԵԿՄ վարչության այսօրվա նախագահի հետ, ու բոլորն էլ սատարում են Մանվել Գրիգորյանին ԵԿՄ նախագահի պաշտոնում»,-ասաց Վարդան Վարդանյանը՝ ավելացնելով, թե զառանցանք են այն խոսակցությունները, որ ԵԿՄ-ն թևերի է բաժանվել:

 

ԵԿՄ վարչության նախագահի խորհրդականն ասաց, որ 2014 թվականի փետրվարին կայանալիք համագումարը 10-րդ հոբելյանական համագումարն է, և տեղեկացրեց, որ Երկրապահ կամավորականների միությունում նորմալ, աշխատանքային մթնոլորտ է:

 

«Համագումարի նախապատրաստական աշխատանքներ են տարվում, մարզային կառույցներում անցկացվում են ժողովներ, ընտրվում են համագումարի պատվիրակներ: ԵԿՄ վարչության նախագահի պաշտոնում Մանվել Գրիգորյանի անունից բացի դեռևս ուրիշ անուն չի քննարկվում, ու այլընտրանք չի էլ պատկերացվում»,-ասաց Վարդան Վարդանյանը:

 

Ի դեպ՝ Վարդան Վարդանյանը Tert.am-ին տեղեկացրեց, որ Ֆրանսիայում պլանային բուժման մեջ գտնվող Մանվել Գրիգորյանը դեկտեմբերի 18-ին կլինի Հայաստանում։ «Բժիշկները նրա առողջական վիճակը գնահատում են շատ լավ»,-հավելեց Վարդան Վարդանյանը: