Կոնգրեսականներ Ադամ Շիֆն ու Բրեդ Շերմանը դատապարտել են Ադրբեջանի կողմից հայ զինծառայողի սպանությունը
Ամերիկացի կոնգրեսականներ Ադամ Շիֆն ու Բրեդ Շերմանն արձագանքել են ադրբեջանական զինուժի կողմից Լեռնային Ղարաբաղի սահմանին օրեր առաջ հայ զինվոր Հրանտ Պողոսյանի սպանության դեպքին։
Ինչպես տեղեկացնում է Asbarez.com կայքը, Շիֆը, մասնավորապես, ասել է, որ շփման գծում հայ զինվորի հերթական սպանության դեպքը հայկական զինուժի դեմ Ադրբեջանի զինուժի կողմից անհիմն հարձակման հետևանք է։ Շիֆի խոսքով՝ անհնար է հերքել այն փաստը, որ նման դաժանությունները հրահանգվում են «վերևներից»։
«Ուղղակի հարկավոր է վերհիշել, թե ինչպես է Ադրբեջանի կառավարությունը փառաբանել Հունգարիայում ՆԱՏՕ-ի դասընթացների ժամանակ հայ սպային կացնահարած ադրբեջանցի Ռամիլ Սաֆարովի իրագործած դաժանությունը։ Բաքվի նոր սպանության դեպքը չի կանգնի արդարադատության առաջ, քանի դեռ միջազգային հանրությունը չի պահանջում, որ նման բարբարոսություններին վերջ դրվի»,- նշված է Շիֆի հայտարարության մեջ։
Մինչդեռ Շերմանն ասել է, որ հայ զինծառայողի սպանության դեպքը ևս մեկ անգամ հաստատում է այն, որ Ադրբեջանը լուրջ տրամադրված չէ Հայաստանի և Արցախի հետ խաղաղ հարաբերությունների հաստատման գործին։
«Թեև ԵԱՀԿ Մինսկի խմբի շրջանակներում հայ-ադրբեջանական բանակցությունների կապակցությամբ հակամարտող կողմերին հրադադարի խնդրանք է ուղղվել, սակայն ադրբեջանցիները սպանել են հայ զինծառայողի։ Կրակ բացելու համար Ադրբեջանը որևէ հիմք չի ունեցել, քանի որ հայկական կողմը չի խախտել հրադադարի խնդրանքը»,-նշված է եղել Շերմանի տարածած հայտարարության մեջ։
Կոնգրեսականը նաև հավելել է, որ Ադրբեջանի գործողությունները շարունակում են վնասել խաղաղ կարգավորման գործընթացին և այդ ուղղությամբ անարգում են ԵԱՀԿ Մինսկի խմբի գործադրած ջանքերը։
Շերմանը եզրափակել է ՝ ասելով, որ ինքը շարունակելու է կանգնել Արցախի ու Հայաստանի կողքին՝ խաղաղության ու անվտանգության հաստատման համար նրանց մղած պայքարում։










