ՀՀ ոստիկանության քրեական հետախուզության գլխավոր վարչության նախկին պետ Հովհաննես Թամամյանն առաջիկայում ազատ կարձակվի
Այսօր կայացած նիստի ժամանակ Դատապարտյալների պայմանական վաղաժամկետ ազատման հանձնաժողովը որոշում է կայացրել ՀՀ ոստիկանության քրեական հետախուզության գլխավոր վարչության նախկին պետ Հովհաննես Թամամյանին վաղաժամկետ ազատ արձակել՝ հանձնաժողովի դրական եզրակացությամբ:
Այս մասին Tert.am-ին հայտնեց Հովհաննես Թամամյանի փաստաբան Արտավազդ Փարսադանյանը:
«Հանձնաժողովը դրական եզրակացություն տվեց՝ հաշվի առնելով իր անցյալը, մնացած էլի... կենսագրական տվյալները»,-ասաց փաստաբանը: Նա նշեց, որ Հովհաննես Թամամյանը միայն մեկ անգամ է դիմել հանձնաժողով:
Հիշեցնենք, որ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը, Արշակ Վարդանյանի նախագահությամբ 2012թ. մարտին կայացրել էր վճիռ, որով ՀՀ ոստիկանության քրեական հետախուզության գլխավոր վարչության նախկին պետ, ոստիկանության գեներալ-մայոր Հովհաննես Թամամյանը դատապարտվել էր չորս տարվա ազատազրկման:
Նա մեղադրվում էր ՀՀ Քրեական օրենսգրքի 308 հոդվածի 1-ին և 2-րդ մասերով (Պաշտոնեական լիազորությունները չարաշահելը, որն առաջացրել է ծանր հետևանքներ) և անազատության մեջ է գտնվում 2011 թվականի մարտի 24-ից:
Հովհաննես Թամամյանի վրա մեկ երրորդով տարածվել էր նաև համաներումը:










