ՀՀ էներգետիկ զարգացումը լիովին կհայտնվի ՌԴ–ի ձեռքում, եթե ԱԺ–ը վավերացնի գազային համաձայնագրերը. Անդրիաս Ղուկասյան
«Դեմ ենք գազի թանկացմանը» նախաձեռնության անդամ Անդրիաս Ղուկասյանը այսօր՝ լրագրողների հետ հանդիպմանը,կարծիք հայտնեց, որ եթե երկուշաբթի օրը Ազգային ժողովը վավերացնի «ՀայՌուսգազարդում» ՀՀ կառավարությանը պատկանող 20% բաժնեմասը Ռուսաստանին վաճառելու մասին երեք համաձայնագրերը, ապա Հայաստանի էներգետիկ զարգացումը ամբողջովին կհայտնվի Ռուսաստանի ձեռքում:
Քաղաքագետն ընդգծեց, որ բաժնեմասի օտարման համաձայնագիրը վերածվեց ռուսական «Գազպրոմի» արտոնյալ վիճակի մասին արձանագրության:
«Միակ արտոնությունը, որ այս համաձայնագրով տրվում է Հայաստանին, մաքսային տուրքից ազատելն է, բայց դա անիմատ բան է, քանի որ եթե Հայաստանը մտնում է Մաքսային միություն, դա առանց այդ էլ ենթադրում է, որ մաքսատուրքեր չեն լինելու այդ երկրների միջև: Միակ արտոնությունը Մաքսային միության անդամ երկրների համար նախատեսված արտոնություններն են: Էական են Հայաստանի կողմից Ռուսաստանին տրվող արտոնությունները»,- ասաց Անդրիաս Ղուկասյանը:
Ըստ Անդրիաս Ղուկասյանի՝ այսօր հասարակությունը մոլորության մեջ է և չի գիտակցում, թե ինչ է իրեն սպառնում: «Այս մթնոլորտում քաղաքացիական հասարակությունը, հասարակական կազմակերպությունները ունեն խնդիր՝ իրազեկել հանրությանը այս ամենի մասին»,- ասաց նա:
Նախաձեռնության մեկ այլ անդամ Արամ Գրիգորյանը նշեց, որ այսօր Ազգային ժողովում քննարկվում է մի հարց, որը պետք է քննարկվեր դեռ տարիներ առաջ, երբ ՀՀ կառավարությունը գաղտնի բանակցություններ էր վարում Գազպրոմի ու ՌԴ կառավարության հետ:
«Կառավարությունը ԱԺ-ից գաղտնի վարել է բանակցություններ, դրանք նույնիսկ բանավոր են եղել: Սա մեծ խնդիր է: Եթե 2011-ին տեղյակ պահեին հանրությանը գազի գնի բարձրացման խնդրին, մենք կունենայինք բոլորովին այլ Ազգային ժողով, չէինք ունենա քաղաքական մի խումբ, որ կարողանար ցանկացած՝ իրեն ցանկալի որոշում կայացներ»,-ասաց նա:
Արամ Գրիգորյանն ընդգծեց, որ Հայաստանի բոլոր խնդիրները կապված են կառավարման համակարգի վատ աշխատանքի հետ Ըստ նրա՝ Հայաստանում բացակայում է պատասխանատվության ինստիտուտը, որի պատճառով էլ այս իրավիճակում ենք հայտնվել:
«Ես երեկ մտածում էի, թե ի վերջո ինչ է անելու ԱԺ-ն, ընդդիմադիրները հայտարարություններ արեցին, վերջացան, բայց որն է լինելու քայլը: Եթե դրսում երեկ լինեին տասնյակ հազարավոր մարդիկ, դա կարող էր ազդեցություն ունենալ ներսում գտնվողների վրա»,-ասաց նա:
Արամ Գրիգորյանը նաև տեղեկացրեց, որ փորձել է բարձրացնել քաղաքացիական ակտիվությունը, ոչ թե մեղադրել ՌԴ նախագահ Վլադիմիր Պուտինին, ով ներկայացնում է իր երկրի շահերը:










