Էրդողանը սպառնացել է «կոտրել իր հակառակորդների ձեռքերը»
Թուրքիայի վարչապետ Ռեջեփ Թայիփ Էրդողանը խոստացել է «կոտրել իր ընդդիմախոսների ձեռքերը», եթե նրանք չդադարեցնեն իր կառավարությանը զրպարտելը։
Ինչպես տեղեկացնում է Лента.ру-ն, այդ մասին էրդողանն ասել է «Արդարություն և զարգացում» կուսակցության կողմնակիցների հանրահավաքի ընթացքում։
Իր ելույթում Էրդողանը «լրտեսներ» և «դավաճաններ» է անվանել նրանց, ովքեր կազմակերպել են թուրք պաշտոնյաների և նախարարների որդիների ձերբակալությունը։ Վարչապետի խոսքով՝ հակակոռուպցիոն գործողությունն իրականում «միջազգային դավադրություն» է։
Ավելի վաղ Թուրքիայի իշխանություններն արդեն արձագանքել էին աղմկահարույց ձերբակալությանը՝ աշխատանքից ազատելով ոստիկանության աշխատակիցների։ Ընդհանուր առմամբ, այս ձերբակալություններից հետո ազատվել է իրավապահ մարմինների շուրջ 70 աշխատակից։










