Nike-ի նոր մարզակոշիկներն ԱՄՆ-ում դարձել են զանգվածային ծեծկռտուքի պատճառ (լուսանկարներ, տեսանյութ)
Մարզահագուստի, կոշիկի ու այլ պարագաների արտադրությամբ զբաղվող ամերիկյան Nike ընկերության նոր Air Jordan 11 Gamma Blue մարզակոշիկները Միացյալ Նահանգներում իրական քաոս են առաջացրել՝ երկրի տարբեր հատվածներում դառնալով զանգվածային ծեծկռտուքների պատճառ։

Ինչպես հայտնում է Daily Mail-ը, ամեն տարի Nike-ը խիստ սահմանափակ թվով վաճառքի է հանում Air Jordans մարզակոշիկների թարմացված տարբերակը, որը ցանկանում են ձեռք բերել բրենդի բոլոր սիրահարները։

Պարբերականը նշում է, որ մասնավորապես Դալասում, Նյու Յորքում,Կալիֆոռնիայում, ինչպես նաև Օհայո և Ֆլորիդա նահանգներում դեռևս գիշերվանից հերթի կանգնած մարդիկ հանուն նորաձև մարզակոշիկների սկսել են իրար ծեծել ու քաշքշել խանութների մոտ ու դրանց ներսում։ Իրավիճակը հարթելու համար ժամանել են ոստիկաններ, ովքեր մեծ դժվարությամբ են կարողացել կարգուկանոն հաստատել։

Daily Mail-ը նշում է, որ ամեն տարի նոր Air Jordans-ի թողարկումն ուղեկցվում է զանգվածային անկարգություններով, գողություններով, հարձակումներով ու անգամ՝ սպանություններով։
2012թ. մարզակոշիկներ գնած 22-ամյա Ջոշուա Վուդսը սպանվել էր 4 երիտասարդի կողմից, ովքեր դա արել էին Air Jordans-ին տիրանալու համար։











