Արգենտինայում պիրանյաների զանգվածային հարձակումից տուժածների թիվը հասել է 70-ի (լուսանկարներ, տեսանյութ)
Արգենտինական Ռոսարիո քաղաքի ափերին հանգստացողների վրա պիրանյաների վտառի հարձակման հետևանքով տուժածների թիվն ավելացել է՝ 60-ից հասնելով 70-ի, տեղեկացնում է РИА-Новости-ն։
«Ներկայում մենք բուժօգնություն ենք տրամադրել 70 մարդու, որոնց թվում կա 7 երեխա։ Բժիշկները ստիպված են եղել նրանցից 2-ի ձեռքի ու ոտքի մատների փաղանգներն անդամահատել»,-ասել է Ռոսարիոյի շտապօգնության ծառայության ղեկավար Ֆեդերիկո Կորնիերը։
Ինչպես ավելի վաղ հայտնել էր Tert.am-ը, միջադեպը տեղի է ունեցել Պարանա գետի քաղաքային ափին։ Վերջին օրերին Ռոսարիոյում ջերմաստիճանը կտրուկ բարձրացել է, ինչի պատճառով էլ պիրանյաներն ավելի ագրեսիվ են դարձել ու հարձակվել են մարդկանց վրա։














