ԵՏՄ-ին կապող ճանապարհի հարցը ՀՀ-ի հիմնական մարտահրավերներից մեկն է. Սուրեն Կարայան
ՀՀ Եվրասիական տնտեսական միությանն անդամակցելու վերաբերյալ պայմանագրի քննարկմանը հիմնական զեկուցող, ՀՀ ֆինանսների նախարարի տեղակալ Սուրեն Կարայանից «Օրինաց երկիր» խմբակցության պատգամավոր Լևոն Դոխոլյանը հարցրեց, թե ինչ աշխատանքներ են տարվում ԵՏՄ-ին միացնող միակ ցամաքային ճանապարհի խնդիրը լուծելու ուղղությամբ:
Ըստ նրա, ներկա պահին միակ ցամաքային կապը Վերին Լարսի ճանապարհն է, ուր ժամանակ առ ժամանակ կուտակումներ են լինում, և որը նաև փակվում է:
Սուրեն Կարայանը պատասխանեց, որ ճանապարհի հարցը ՀՀ-ի հիմնական մարտահրավերներից մեկն է: «Եվ այդ ուղղությամբ ինչպես Հայաստանի, այնպես էլ Վրաստանի և Ռուսաստանի միջև բանակցություններ են ընթանում, երբ ակնհայտ ասելիք լինի, այդ ժամանակ էլ կտեղեկացնենք»,-ասաց նա:










