Հայերը գիտեն Հոլոքոստի և հոլոքոստի միջև տարբերությունը. The Independent

11:40 • 02.12.14

Ռոբերտ Ֆիսկը բրիտանական The Independent թերթում տպագրված իր հոդվածում, խոսելով մամուլում օգտագործվող վիճելի եզրույթների և անունների մասին, նշել է նաև Հայոց ցեղասպանությունը մեծատառով Հոլոքոստ գրելու հարցը:

 

Հեղինակը հիշում է, որ տարիներ առաջ նա The Independent թերթի համար գրված հոդվածում օգտագործել է «Հայկական Հոլոքոստ» արտահայտությունը: Խմբագիրներից մեկը, սակայն, անմիջապես մեծատառ Հ-ն փոխել է փոքրատառ հ-ի:

 

«Հեռախոսս չէր դադարում զանգեր ստանալ: Հայերը վրդովված էին: Նրանք պահանջում էին իմանալ՝ ինչո՞ւ նրանք արժանի չէին մեծատառ Հ-ի: Թուրքերը բավականաչափ հայեր չե՞ն կոտորել նրանց մեծատառ Հ-ով որակավորելու համար»,- գրում է հեղինակը:

 

Ֆիսկի խոսքով՝ ինքն այդ ժամանակ երկար նամակ է գրել իր այդ ժամանակվա խմբագիր Սիմոն Կելներին՝ նրան բացատրելով, որ դա ռասիստական մոտեցում է՝ տարբերություն դնել երկու ցեղասպանությունների միջև, քանի որ չի կարելի սահմանման համար հիմք ընդունել 1, 500,000 և 6,000,000-ի միջև քանակային տարբերությունը:

 

«Բացի այդ, իսրայելցիները (ի հակադրություն Իսրայել պետությանը, որը հայկական դեպքերը չի ճանաչում անգամ որպես ցեղասպանություն) հայկական կոտորածներն անվանում են Հայկական Շոա՝ օգտագործելով Հոլոքոստի համար եբրայերեն բառը»,- գրում է նա:

 

Խմբագիրն այնուհետ Ֆիսկի նամակը որպես հոդված տպագրել է The Independent-ում, որն էլ այնուհետ արժանացել է լրագրողական մրցանակի:

 

«Ավելի վաղ այս ամիս ես կրկին անդրադարձա Հայկական Հոլոքոստին, և խմբագիրը, որը ծանոթ չէր արտահայտությանը, կրկին նվազեցրեց այդ տառի կարևորությունը: Նա փոխեց մեծատառ Հ-ն հ-ի»,- գրում է Ֆիսկը՝ նշելով, որ այդ փաստը կրկին առաջացրել է հայերի վրդովմունքը:

 

Հայերի բազմաթիվ դժգոհություններից հետո կայքում տեղադրված տարբերակում փոքրատառը կրկին փոխարինվել է մեծատառ Հ-ով: