Հարավային Կորեան հյուսիսային հարևանի հետ սահմանին տոնածառ կդնի
Հարավային Կորեայի իշխանությունները թույլ են տվել Հյուսիսային Կորեայի հետ սահմանի մոտ մեծ ամանորյա տոնածառ դնել՝ չնայած նրան, որ դա վստահաբար կառաջացնի Փհենյանի զայրույթը, հաղորդում է BBC-ի ռուսական ծառայությունը:
Այս տարվա հոկտեմբերին հարավկորեացիներն անվտանգության նկատառումներով ապամոնտաժել էին սահմանամերձ աշտարակը, որը զարդարում էին որպես տոնածառ Սուրբ Ծննդի նախօրեին:
Կառույցը տեսանելի էր որոշակի տարածքներից, և Փհենյանի աթեիստական ռեժիմը դրանում տեսնում էր կրոնական քարոզչության տարրեր:
ԿԺԴՀ-ի սահմանին ամանորյա տոնածառի տեղադրման համար հարավկորեական իշխանություններին դիմել է «Կորեայի քրիստոնեական խորհուրդը»:
Երեքշաբթի երկրի պաշտպանության նախարարությունը հավանության է արժանացրել քրիստոնյաների խնդրանքը, զարդարված և վառ լուսավորված տոնածառը սահմանի մոտ կտեղադրվի դեկտեմբերի 23-ին՝ «խաղաղության համար աղոթելու համար»:
Քրիստոնյաները խոստանում են ծառը հեռացնել տոնից երկու շաբաթ անց:










