Բրիտանական Ռազմաօդային ուժերը վերջին 13 տարում ամենախոշոր զորավարժություններն են անցկացրել

20:45 • 29.03.15

Մարտ ամսին  Մեծ Բրիտանիայի Ռազմաօդային ուժերն անցկացրել են վերջին 13 տարում ամենալայնամասշտաբ զորավարժությունները:

Ինչպես հաղորդում է BBC-ն` բրիտանական Sunday Times-ին  հղումով, զորավարժությունների գլխավոր նպատակը հակառակորդի ռազմական ինքնաթիռների «զանգվածային հարձակումները» ետ մղելու  սցենար մշակելն էր: 

Աղբյուրի համաձայն` զորավարժություններ անցկացվել են մարտի 19-ին, սակայն բրիտանական ԶԼՄ-ները նոր են դրա մասին հաղորդում: Հոդվածագիրը զորավարժությունների անցկացումը կապում է միջազգային օդային տարածքում ռուսական ռազմական ինքնաթիռների առավել  հաճախակի հայտնվելու հետ: 

Զորավարժություններին մասնակցել է ավելի քան 30 ռազմական ինքնաթիռ, այդ թվում` 20 «Թայֆուն» կործանիչ և «Տորնադո» ռմբակոծիչ: 

Փետրվարին Թագավորական Օդուժի հրամանատարության ղեկավար Մայքլ Գրեյդոնը կարծիք էր հայտնել, որ Մեծ Բրիտանիայի  Ռազմաօդային ուժերը ի վիճակի չեն արժանի դիմադրություն ցույց տալ պոտենցիալ հակառակորդին: