Պատմությունից պետք է դասեր քաղել, որպեսզի նման հանցագործություն չկրկնվի. չեխ պատգամավորը՝ Ցեղասպանության մասին
100 տարի առաջ մի ամբողջ ազգ գրեթե ոչնչացվեց երկրի երեսից. հինավուրց ազգ էր, ով այդ տարածքում բնակվում էր ավելի քան երկուսուկես հազարամյակ: Երևանում ընթացող «Ընդդեմ Ցեղասպանության հանցագործության» գլոբալ ֆորումի ժամանակ իր ելույթում հայտարարեց Չեխիայի խորհրդարանի սենատի փոխնախագահ Զդենեկ Շկրոմախը:
«Հայ ազգը փոքր է, բայց հպարտ ազգ է: Մենք այսօր հայ ազգի կողքին ենք»,-ասաց չեխ խորհրդարանականը՝ նշելով, որ պետք է պատմությունից դասեր քաղել, որպեսզի այլևս նման հանցագործություն չկրկնվի:
Զդենեկ Շկրոմախը ցավով արձանագրեց, որ այսօր շատ քիչ կամ ընդհանրապես դասեր չեն քաղում պատմությունից:
«Պետք է բարձրաձայնել այդ հանցագործության մասին ու պայքար մղել այդ հանցագործության դեմ, որպեսզի ապագայում կանխվեն ցեղասպանությունները: Պետք է հենց պատգամավորները խոսեն անարդարության դեմ»,- նշեց Զդենեկ Շկրոմախը:










