Բրիտանացի ռադիոհաղորդավարը սխալմամբ հայտարարել է Դևիդ Քեմերոնի մահվան մասին (տեսանյութ)

Բրիտանական Heart FM Radio-ի հաղորդավար Ֆիոնա Վինչեսթերն այսօր ուղիղ եթերի ժամանակ հայտնվել է բավական տհաճ իրավիճակում:

Ինչպես հայտնում է Mirror պարբերականը, հայտնի ռոք աստղ Դևիդ Բոուիի մահվան լուրը հայտնելու ժամանակ ռադիոհաղորդավարուհին թույլ է տվել լեզվի սայթաքում` արտաբերելով երկրի վարչապետ Դևիդ Քեմերոնի անունը:

«Մահացել է Դևիդ Քեմերոնը»,-տխուր ձայնով հայտնել է Վինչեսթերը, ով վայրկյաններ անց գիտակցել  է իր սխալը, ներողություն հայտնել ու հանգուցյալ երաժշտի անունն արտասանել:

Նշվում է, որ այս միջադեպն ակտիվորեն քննարկվել է Twitter սոցկայքում:

Հիշեցնենք, որ 69-ամյա Բոուին մահացել է հունվարի 10-ին` քաղցկեղի պատճառով: Տաղանդաշատ բրիտանացին համարվում էր 20-րդ դարի ռոք կուռքերից մեկը: