Հուրգադայում հյուրանոցի վրա հարձակում գործածները ցանկացել են ռուս զբոսաշրջիկների վրա հարձակվել. լրատվամիջոցներ

Երկու զինված տղամարդիկ, որոնք հարձակվել էին Հուրգադայում Bella Vista հյուրանոցի վրա, հույս են ունեցել հարձակում գործել ռուս զբոսաշրջիկների վրա: Այս մասին գրում է Al Masry Al Youm պարբերականը` հղում անելով Եգիպտոսի պետանվտանգության դատախազությանը։

Այդ մասին պատմել է ձերբակալված հանցագործը։ Նրա խոսքով` իրենց հարձակումը կապված է եղել Սիրիայում ՌԴ-ի ռազմական գործողության հետ, փոխանցում է rosbalt.ru-ն:

Հարձակման մասնակիցը հարցաքննման ընթացքում պատմել է, որ իր համախոհի հետ փորձել է միանալ իսլամիստական խմբավորմանը երկրի սահմաններից դուրս, սակայն դա իրենց չի հաջողվել: Այդ ժամանակ նրանք փորձել են ահաբեկչություն կազմակերպել երկրի տարածքում` ընտրելով Հուրգադա հանգստավայրը:

Ձերբակալվածը պատմել է, որ իրենք հարձակման օրը զինվել են, նախ գնացել սուպերմարկետ, սակայն այնտեղ արտասահմանցիներ չտեսնելով` գնացել են հյուրանոց, որտեղ հարձակվել են հյուրանոցի ռեստորանի այցելուների վրա։
 

Հյուրանոցի աշխատակիցը պատմել է, որ հանցագործներից մեկը փորձել է պատանդ վերցնել կանանցից մեկին: Նա կնոջ պարանոցին դանակ է մոտեցրել, ինչից հետո անվտանգության ուժերի ներկայացուցիչները կրակ են բացել: Արդյունքում հանցագործներից մեկը սպանվել է, մյուսը` վիրավորվել:

Հյուրանոցի հյուրերից վիրավորվել է 3 մարդ։