Թուրքիայում ոստիկանական մեքենա է պայթեցվել. կա 10 վիրավոր

Թուրքիայի Մարդին նահանգի Նուսայբին շրջանում ոստիկանական մեքենա է պաթեցվել։ Ռումբի պայթեցման հետևանքով վիրավորվել է 10 մարդ, այդ թվում՝ 9 ոստիկան։

Ինչպես տեղեկացնում է թուրքական «Աքշամ» պարբերականը, միջադեպը տեղի է ունեցել երեկ երեկոյան Դիջլե շրջանում։

Ենթադրաբար Քուրդիստանի աշխատավորական կուսակցության (PKK) զինյալների՝ ճանապարհին տեղադրած ռումբը պայթել է ոստիկանական ծառայողական մեքենայի անցնելու պահին։

Դեպքի վայր մեկնած շտապօգնության աշխատակիցները վիրավորներին տեղափոխել են տարբեր հիվանդանոցներ։

Պայթյունից հետո դեպքի վայր են ուղարկվել զրահապատ մեքենաներով հատուկջոկատայիններ և ահաբեկչության դեմ պայքարի բաժնի ոստիկաններ։

Ճանապարհի երթևեկությունը դադարեցվել է՝ անվտանգության նկատառումներով։