Կարիքը կա ավելի արդար հասարակության, որտեղ յուրաքանչյուրը կարողանա արժանավայել կյանք վարել. Պապի աղոթքը Գյումրիում
13.24
Հռոմի Սրբազան քահայանապետի մասնակցությամբ Գյումրիի միջոցառումների շարքը դեռ շարունակվելու է: Ֆրանցիսկոս պապը Գյումրիում կայցելի Անարատ հղիության հայ քույրերի միաբանության Տիրամար Հայաստանի կուսաստան, ՀՀ Առաքելական եկեղեցու Սուրբ Տիրամոր Յոթ Վերք եկեղեցի և Սրբոց Նահատակաց կաթողիկե եկեղեցու մայր տաճար:
13.20
Պատարագից հետո երկու հայրապետերը շրջեցին պապամոբիլով Գյումրիի փողոցներում՝ իրենց օրհնությունը բաշխելով հավատացյալներին: 


13.13
Հռոմի Սրբազան քահանայապետ Ֆրանցիսկոս պապը շնորհակալություն հայտնեց ներկաներից, որ մասնակցեցին պատարագին: Հատկապես ողջունեց նրանց, ովքեր առատաձեռնությամբ ու շոշափելի սիրով օգնում են կարիքավորներին:
«Սուրբ կույս Մարիամը թող միշտ ձեզ ընկերանա և առաջնորդի ձեր քայլերը եղբայրության և խաղաղության ուղով»,-ասաց Հռոմի պապը:
Ազդարարվեց Սուրբ և անմահ պատարագի ավարտը: «Տերը ձեզ հետ»,-ասաց Հռոմի պապը:
13.09
Կաթողիկե եկեղեցու առաջնորդ Ռաֆայել արքերպիսկոպոս Մինասյանը Սրբազան քահանայապետի օրհնությունը խնդրեց հայերի համար և ողորմության տարվա համար: Նշենք որ Հռոմի պապի կողմից տարին հռչակվել էր ողորմության տարի:
Զրբազան հայրը նշեց, որ իր ներկայության կարևոր կետը թող լինի «մեր հայացքների բևեռումը» դեպի Քրիստոսի փրկություն, խաղաղություն լինի, թե՛ մեր երկրում, թե՛ Սփյուռքում, և՛ աշխարհում, և՛ հիշատակեց նաև բոլոր նրանց ովքեր նահատակվել են հանուն քրիստոնեկական հավատքի:
Սրբազան հայրը նվեր մատուցեց սրբազան քահանայապետին:
12.46
Սրբազան քահանայապետն ինքը մոտեցավ հավատացյալներին՝ բաշխելու Քրիստոսի մարմինն ու արյուն համարվող սուրբ նշխարը: Նրան միացան նաև մյուս համապատարագիչները:
«Օրհնյալ լինեն Տիրոջ ընթրիքին հավաքվածները, սա է տիրոջ Աստծո գալը, որ մաքրում է աշխարհի մեղքը: Սա է բուն իմաստը հաղորդության»,–ասաց նա։
12.15
Կարիքը կա ավելի արդար հասարակության, որտեղ յուրաքանչյուրը կարողանա արժանավայել կյանք վարել. Պապի աղոթքը Գյումրիում
Անաստվածության երկար տարիների կործանումից հետո, երկրաշարժի սարսափելի նյութական ավերածություններից հետո այսօր գտնվում ենք այստեղ Աստծո շնորհակալություն հայտնելու. Աստծուց ստացված սիրո միջոցով է, որ եկեղեցու դեմքը երիտասարդանում և հմայիչ է դառնում, Գյումրիի Վարդանանց հրապարակում Սուրբ Պատարագի ժամանակ իր աղոթքում ասաց Հռոմի Ֆրանցիսկոս պապը:
«Կոչված ենք միշտ կառուցելու և վերակառուցելու հաղորդությունը առանց հոգնելու կամուրջներ կառուցելու, ոչ թե պարիսպներ կամ բաժանարար պատնեշներ: Հայ ժողովուրդը թող միշտ ավելի միասնական լինի հավատի և սիրո մեջ՝ փոխադարձ հարգանքով և երկխոսությամբ, իմանալով որ միակ մրցույթը, որ հնարավոր Տիրոջ աշակերտների միջև՝ ստուգելն է, թե ով կարող է ավելի մեծ սեր նվիրել:
Օգտակար է ամեն օր նորոգել այս հանդիպումը Աստծո խոսքի ընթերցումով և աղոթքով: Երբ Հիսուս կանչի հետևելու իրեն, մի տատանվեք քաջությամբ այո ասելու նրան: Նա մեզ ճանաչում է, սիրում է և ուզում է ազատել սիրտը վախի և հպարտության ծանրությունից:
Սիրո հիմքի վրա է հաստատված Հիսուսի աշակերտի կյանքը, և սիրո միջոցով է, որ եկեղեցու դեմքը երիտասարդանում և հմայիչ է դառնում: Գթառատ սերը քրիստոնյայի այցեքարտն է: Նա ասում է՝ սրանից բոլորն իմանում են, որ իմ աշակերտներս եք, եթե սիրեք իրար»,– ասաց նա:
Ֆրանցիսկոս պապը նաև նշեց, որ բարի մարդկանց կարիքը կա, որ «գործնականում օգնեն մարդկանց, կարիքը կա ավելի արդար հասարակության, որտեղ յուրաքանչյուրը կարողանա արժանավայել կյանք վարել և արդարորեն հատուցվող աշխատանք ունենա»:
«Անցած տարվա ծիսակատարումով, որին մասնակցեց Ամենայն հայոց կաթողիկոս Գարեգին Բ-ն, ուզեցի բոլորի ուշադրությանը հանձնել Գրիգոր Նարեկացու կերպարը: Նա կարապետն ու մարագարեն էր աստվածային ողորմության, հայտարարելով, որ երբեք բարկության խավարից չի մթանգնել նրա ողորմության լույսը: Նարեկացին ոչ միայն ուսուցման, այլև կյանքի վարդապետ է, որովհետև սովորեցնում է, թե որքան կարևոր է ճանաչել ինքներս մեզ, և վերքերի ու թշվառների առջև բացվել մարդկանց նկատմամբ բարությամբ լցված: Խնդրում եմ Սուրբ Գրիգորի խոսքերով աստվածային ողորմությունը և սիրելուց չհոգնելու պարգևը:
Սուրբ հոգի, քեզ ենք ուղղում մեր աղաչանքները՝ պարհևիր մեզ սիրո և բարի գործերի քաջալերման շնորհը, հոգի գթության, մարդասիրության և ողորմության: Ողորմյա մեզ Տեր աստված մեր ըստ մեծի ոողորմության քո, Ամեն»:
11.58
Գյումրիի ժողովուրդն առանձնանում է խորին հավատքով և եկեղեցասիրությամբ. Գարեգին Բ կաթողիկոս
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը Հռոմի Սրբազան Քահանայապետ Ֆրանցիսկոս Պապի կողմից Գյումրիի Սրբոց Վարդանանց հրապարակում մատուցված պատարագի ընթացքում հանդես է եկավ ելութով: Ներկայացնում ենք Ամենայն Հայոց կաթողիկոսի խոսքն ամբողջությամբ:
«Նոր պատվիրան եմ տալիս ձեզ, որ սիրէք միմեանց. ինչպէս ես ձեզ սիրեցի, դուք էլ միմեանց սիրեցէք» (Հովհ. ԺԳ 34):
Ձերդ Սրբություն,
Սիրեցյալ հոգևոր եղբայրներ և բարեպաշտ հավատացյալներ,
Այսօր, երբ մեր Եկեղեցին հիշատակում է Տիրոջ սուրբ առաքյալների տոնը, որքան քաղցրահունչ ու առավել ուժգնությամբ է հնչում մեր հոգիներին այս պատգամը, որը մեր Տերն ուղղեց Իր աշակերտներին: Տերունապատվեր սիրո այս ջերմ զգացումով հանուն տարածաշրջանի ողջ հավատացելոց՝ բարի գալուստ ենք մաղթում Ձեզ, սիրեցյալ եղբայր ի Քրիստոս, Գյումրի քաղաք: Ուրախություն է Մեզ համար աղոթակից լինել Հայ Եկեղեցու և հայ ժողովրդի մեծ բարեկամիդ մատուցած Պատարագին:
Գյումրին Հայաստանի պատմական այն քաղաքներից է, որտեղ ծաղկում են ապրել հայ քրիստոնեական դարավոր արժեքները, ներդաշնակությամբ ձուլվել մեր ժողովրդի պատմությունն ու մշակույթը և հյուրընկալության սիրառատ ոգին: Գյումրիի ժողովուրդը առանձնանում է խորին հավատքով և եկեղեցասիրությամբ, կրողն է նաև քրիստոնեական եղբայրական համակեցության գեղեցիկ ավանդույթի, որի վկայությունն է այսօր այստեղ աղոթքի կանգնած Հայ Առաքելական և Կաթոլիկ Եկեղեցիների և քրիստոնեական այլ հարանվանությունների հավատացյալ զավակների ներկայությունը: Խորհրդային աստվածմերժությ ան տարիներին, երբ Հայաստանում կործանվում և փակվում էին եկեղեցիները, և միայն հավատացյալ մեր ժողովրդի անտեղիտալի դիմադրության շնորհիվ բաց էին մնացել Մայր Աթոռ Սուրբ Էջմիածինը և սակավ եկեղեցիներ, Գյումրիի Սուրբ Աստվածածին (Յոթվերք) եկեղեցին իր մայրական գիրկը բացեց և հովանի ու աղոթավայր դարձավ Հայաստանի հյուսիսային շրջանների և Վրաստանի սահմանամերձ հայաբնակ քաղաքների ու գյուղերի բոլոր քրիստոնյաների համար՝ անկախ ազգային ու դավանական պատկանելությունից՝ լինեին նրանք հայ առաքելական, կաթոլիկ, թե օրթոդոքս: Եկեղեցու հյուսիսային նախամուտքը վերածվեց կաթոլիկ հավատացյալների աղոթավայրի, ուր տեղադրվեց և առ այսօր պահպանվում է կաթոլիկ ավանդույթին բնորոշ Տիրոջ խաչելության արձանը`բերված Արևիկ գյուղի կաթոլիկ եկեղեցուց, իսկ հարավային նախամուտքը տրամադրվեց ուղղափառներին, որտեղ ամենապատվավոր տեղում բարձրացվեց Սուրբ Նիկոլայոս Սքանչելագործի ռուսական սրբապատկերը: Այսպես Գյումրին և Սուրբ Աստվածածին (Յոթվերք) եկեղեցին էկումենիզմի ժամանակակից սահմանումից տարիներ առաջ դարձան գործնական էկումենիզմի մատակարարն ու քարոզիչը:
Սիրեցյալ եղբայր ի Քիստոս, քաղաքը, որտեղ մենք այսօր գտնվում ենք, հյուրընկալ ու ջերմ իր սրտի վրա կրում է նաև կնիքը տառապանքի: Քսաներորդ դարասկզբին, երբ մեր ժողովուրդը ցեղասպանության էր ենթարկվում, Գյումրին նույնպես զգաց Օսմանյան կայսրության ջարդարար և զավթողական քաղաքականության ծանր հարվածները և այսօր էլ կանգնած է փակ սահմանի դիմաց՝ իբրև հարյուր տարի առաջ իրագործված ցեղասպանության և շարունակվող ժխտողական քաղաքականության վկա:
Մեր ժողովրդի զավակները Գյումրիում հավատքով ու քաջարի ոգով դիմագրավեցին նաև երկրաշարժի աղետը: Այս առիթով ի դեմս Ձերդ Սրբության՝ երախտագիտության Մեր խոսքն ենք ուղղում Կաթոլիկ Եկեղեցուն, որը ծանր այդ օրերին նույնպես եղբայրսիրությամբ օգնության ձեռք մեկնեց երկրաշարժից տուժածներին՝ համաձայն առաքյալի խոսքի. «հոգ տանենք միմեանց՝ սիրոյ և բարի գործերի յորդորելով» (Եբր. Ժ 23-24): Այսօր էլ գյումրեցի մեր զավակները շարունակում են հաղթահարել դժվարությունները և նվիրյալ ջանքեր բերում՝ բարօր ու զարգացող կյանքով բարեշեն դարձնելու Գյումրին, որի վկայությունն են վերջին տարիներին կառուցված կաթոլիկ եկեղեցին, այս հրապարակին հովանի պատմական երկու նորոգված եկեղեցիները՝ իբրև Գյումրիի հառնող կյանքի խորհդանիշերը:
Գոհություն հայտնելով Տիրոջը Գյումրիում Մեր սիրեցյալ եղբոր՝ Ֆրանցիսկոս Պապի հետ միասնական աղոթքի այս շնորհառատ օրվա համար՝ Մեր հորդորն ու մաղթանքն ենք բերում ձեզ, սիրելի հավատացյալներ, հավատքի, եղբայրսիրության ու հույսի աներեր քայլերով վկայելու այս աշխարհում Քրիստոսի պատգամը. «Նոր պատվիրան եմ տալիս ձեզ, որ սիրէք միմեանց. ինչպէս ես ձեզ սիրեցի, դուք էլ միմեանց սիրեցէք» (Հովհ. ԺԳ 34):
Այս մաղթանքով նաև ողջունում և Մեր գնահատանքն ու օրհնությունն ենք բերում Գյումրիի և մարզի իշխանավորներին, Շիրակի հավատավոր Մեր զավակներին: Մեր գնահատանքն ու օրհնությունն ենք բերում Շիրակի թեմի Առաջնորդ Միքայել եպիսկոպոս Աջապահյանին, նրան լծակից հոգևորականներին և հայ կաթոլիկ համայնքի եկեղեցականներին՝ Առաջնորդ Ռաֆայել արքեպիսկոպոս Մինասյանի գլխավորությամբ: Մաղթում ենք, որ Տիրոջ զորակցությամբ նրանք շարունակեն արդյունավորել իրենց հավատավոր հոտի խնամքն ու հովվությունը և եղբայրսիրությամբ գործակցությունը:
Սուրբ առաքյալների և Տիրոջ բոլոր վկաների բարեխոսության հայցով աղոթք ենք բարձրացնում առ Ամենակալն Աստված աշխարհի խաղաղության, մարդկության բարօր ու ապահով կյանքի և Քրիստոսի Սուրբ Եկեղեցու պայծառության համար:
Ձերդ Սրբություն, սիրեցյալ եղբայր ի Քրիստոս, Ձեր այցելությունը Գյումրի հոգևոր նորոգություն է Շիրակի տարածաշրջանի հավատացյալներին և միշտ պիտի հիշվի սիրով ու ջերմությամբ: Ուրախ սրտով վերստին հաստատում ենք, որ Ձեր այցը նոր վկայություն է մեր Եկեղեցիների բարի հարաբերությունների: Թող Աստված ամուր պահի եղբայրությունը և արգասավորի գործակցությունը մեր Եկեղեցիների այսօր և միշտ: Ամեն»:
11.25
Երկու եկեղեցիների հովվապետերը օրհնություն տալով հավաքվածներին՝ մոտեցան Վարդանանց հրապարակում պատրաստված խորանին: Հռոմի պապը համբուրեց սուրբ սեղանը, ապա խնկարկեց այն, ինչպես նաև շուրջը հավաքվածներին:
Նշենք, որ հրապարակ մարդկանց մուտքը հրավիրատոմսերով է եղել: Բաժանվել են հավատացյալներին և պապին մոտիկից տեսնելու ցանկացողներին՝ 14 000 հրավիրատոմսեր:
Բացի այդ, Գյումրիի հարակից փողոցներում տեղադրվել են մեծ էկրաններ, որտեղից ևս մարդիկ հետևում են Սուրբ պատարագին:
Պատարագը Գյումրիում անցկացնելու հիմնական պատճառն այն է, որ ամենամեծ կաթոլիկ համայնքը Շիրակի մարզում է, շուրջ 8000 կաթոլիկներ







Գյումրիի Վարդանանց քաղաքային հրապարակը բազմամարդ է: Հավաքվածները այստեղ են՝ մասնակցելու պատմական իրադարձությանը՝ Հռոմի Սրբազան քահանայապետ Ֆրանցիսկոս պապի կողմից անցկացվող սուրբ պատարագին, որին իր աղոթակցությամբ կմասնակցի նաև Գարեգին Բ Ամենայն հայոց կաթողիկոսը:
Սուրբ պատարագը կմատուցի լատինական ծեսով, սակայն ընթերցումներ կլինեն հայերեն, ինչպես նաև որոշ շարականներ երգչախումբը կերգի հայկական ծեսով:
Նշենք, որ Հռոմի պապի հետ համապատարագում են Հայ կաթողիկե եկեղեցու կաթողիկոս-պատրիարք Գրիգոր Պետրոս Գաբրիելյանը, ինչպես նաև հայ Կաթողիկե եկեղեցու առաջնորդ Ռաֆայել արքեպիսկոպոս Մինասյանը:










