Այժմ դիտարկվում են պայթյունի տարբեր վարկածներ. Պուտինը՝ Սանկտ Պետերբուրգի մետրոյում պայթյունների մասին

17:13 • 03.04.17

ՌԴ նախագահ Վլադիմիր Պուտինը հայտնել է, որ ստացել է հատուկ ծառայությունների զեկույցները Սանկտ Պետերբուրգի մետրոյում այսօր տեղի ունեցած պայթյունների մասին: Նրա խոսքով՝ այժմ դիտարկվում են տարբեր վարկածներ՝ ինչպես կենցաղային, այնպես էլ քրեական, անգամ ահաբեկչական բնույթի, գրում է ТАСС-ը:


«Պատճառները հայտնի չեն, այդ պատճառով այդ մասին դեռ վաղ է խոսել: Հետաքննությունը ցույց կտա»,- ասել է Պուտինը՝ սկսելով Բելառուսի նախագահ Ալեքսանդր Լուկաշենկոյի հետ հանդիպումը:


«Բնականաբար, միշտ դիտարկվում են բոլոր տարբերակները՝ և՛ կենցաղային, և՛ քրեական, նախևառաջ ահաբեկչական բնույթի դրսևորումները: Կտեսնենք: Հետաքննությունը մոտ ժամանակներս կտա բոլոր պատասխաններն այն մասին, թե ինչ է տեղի ունեցել»,- նշել է ՌԴ նախագահը:


Ավելի վաղ հաղորդվել է, որ նախնական տվյալներով՝ ՌԴ Սանկտ Պետերբուրգ քաղաքի մետրոյում տեղի ունեցած երկու պայթյունի հետևանքով զոհվել է տասը մարդ: Հաղորդվում է 50 վիրավորի մասին:


«Ինտերֆաքս» գործակալությունը հայտնում է, որ մետրոյում տեղի է ունեցել երկու պայթյուն: Պայթուցիկ սարքերի հզորությունը տրոտիլային համարժեքով մոտ 200-300 գրամ է եղել։ 


Նախնական տեղեկություններով՝  պայթյուններից մեկը տեղի է ունեցել «Сенная площадь» կայարանում մետրոյի վագոնում: Մյուս պայթյունը տեղի է ունեցել «Технологический институт» կայարանում:


Հաղորդվում է, որ վիրավորների տարհանման համար օգտագործվում են ուղղաթիռներ: Քաղաքի մետրոպոլիտենը հայտնել է, որ պայթյուններից հետո փակ են մետրոյի բոլոր կայարանները: