Հնգյակ նորածիններից տղայի վիճակը ծայրահեղ ծանր է գնահատվում. ԱՆ

14:43 • 08.05.17

Մայիսի 3-ին լույս աշխարհ եկած հնգյակից տղայի վիճակը ծայրահեղ ծանր է, իսկ Մարգարյան հիվանդանոցում գտնվող աղջկանը՝ կայուն ծանր:

Այս մասին Tert.am –ին հայտնեց Առողջապահության նախարարության հասարակայնության հետ կապերի վարչության պետ Անահիտ Հայթայանը:

Նրա խոսքով՝ անկախ նրանից, թե  երեխան քանի կիլոգրամ է ծնվել՝ 600, 800, թե 1000 գրամ, բոլոր երեխաների մոտ կա խորը անհասություն, քանի որ նրանք ներարգանդային կյանքում  բավականաչափ երկար չեն ապրել:

Անդրադառնալով հնգյակից 2-ի անցանկալի վախճանի պատճառներին` Անահիտ Հայթայանը մեջբերեց ՀՀ ԱՆ գլխավոր մանկական ռեանիմատոլոգ Հրանտ Կալենտերյանին՝ նշելով. «Խնդիրը խորը անհասության պատճառով օրգան-համակարգերի ոչ բավարար զարգացումն է, ինչի հետևանքով բազմաթիվ բարդություններ են առաջանում, որոնք սպասելի են և, ցավոք,  հաճախ հնարավոր չէ կանխարգելել կամ իրավիճակը փրկել»:


Հիշեցնենք, որ հնգյակի հայրն ավելի վաղ հայտարարել էր, որ վրդովված են և ակնկալում են, որ գոնե այժմ փոքրիկների բուժման համար դրսից մասնագետներ կհրավիրվեն։ «Երեխաներին անհրաժեշտ են լուրջ մասնագետներ։ Ինչո՞ւ արտասահմանից չհրավիրեցին մասնագետների, և ծնված հենց առաջին վայրկյանից լուրջ հսկողություն չսահմանվեց. հնարավոր է, որ երեխաների կյանքը հնարավոր լիներ փրկել: Հիմա լսել ենք, որ նոր-նոր ուզում են դրսից մասնագետներ հրավիրեն. ի՞նչ է դա նշանակում, որ տեսնեն՝ երեխաների վիճակը վատանում է, նո՞ր կանչեն։ Ինչո՞ւ հենց սկզբից չեն դա արել, որ այսօրվա օրով իմ երկու երեխաները հիմա չկան»,-ասել էր հայրը՝ Վարդան Կարապետյանը: