«Նաիրիտի» հրդեհն ավելի շուտ ծագեց, քան այն միջոցառումը, որ պիտի իրականացվեր. Վրեժ Գաբրիելյան
Խորհրդային տարիներին, երբ քլորոպրենի արտադրությունն ակտիվ էր, «Նաիրիտը» լրիվ թափով աշխատում էր, նույնիսկ արտադրական թափոններն օգտագործում էին մեկ այլ երկրում՝ այլ նպատակով. այս էթինոլը, որ ստացվում է քլորոպրենի արտադրությունից, օգտագործվում էր Խորհրդային Միության նավաշինական արդյունաբերության մեջ՝ որպես նավերն արագ հերմետիկացնող նյութ: Այս մասին ասել է ԱԻՆ ՓԾ տնօրենի տեղակալ, գեներալ-մայոր Վրեժ Գաբրիելյանը «Կենտրոն» հեռուստաընկերության եթերում՝ անդրադառնալով «Նաիրիտում» բռնկված քիմիական նյութին:
Նրա խոսքով՝ Խորհրդային Միության փլուզումից հետո շարունակվում էր քլորոպրենի արտադրությունը, բայց արտահանում չկար, «Նաիրիտն» էլ չուներ հատուկ պահեստներ էթինոլի երկարատև պահպանման համար: Միջանցիկ պահեստարաններ էին, խորհրդային տարիներին ժամանակավորապես էթինոլը լցնում էին այդ տարաների մեջ, հետո երկաթուղային տրանսպորտով փոխադրում Ռուսաստան:
ԱԻՆ ՓԾ տնօրենի տեղակալի տվյալներով՝ օգտագործվող 13 տարայից 4-ը բետոնապատ է, 9-ը՝ մետաղական: Այդ 13 տարայի մեջ այսօր տեղակայված է 1025 տոննա էթինոլ՝ քարացած և 497 տոննա՝ հեղուկ վիճակում: Այդ 4 բետոնապատ տարայի պարունակությունն է բռնկվել, դրանցից ամեն մեկը 100 խմ տարողություն ունի, ընդհանուր 200 խմ էթինոլ է այրվել:
«Հեղուկ վիճակում նյութն ավելի անվտանգ է, քան պինդ վիճակում: Շատ ջրիկ չէ, մեղրածոր է: Ջրային զանգված կա իր մեջ և թույլ չի տալիս շուտ բռնկվել: Իսկ կոշտացած վիճակում ինքնաբռնկվող նյութ է, արագ ինքնաբռնկվում է: Հրդեհաշիջումը դեռ չի ավարտվել, բայց մեկուսացվել է: 109 փրկարար, 11 հիմնական հրդեհաշիջման հրշեջ մեքենաները՝ իրենց մարտական հաշվարկներով, մեկ հատուկ հրշեջ մեքենա իրականացնում են հրդեհի մեկուսացման և շիջման աշխատանքներ: Էթինոլի մյուս տարաների համար տարվում է նաև հովացման աշխատանք, որ հանկարծ չբռնկվեն»,-տեղեկացրել է գեներալ-մայոր Վրեժ Գաբրիելյանը:
Նա ասել է, որ աշխատանքային խումբ կա ստեղծված, որը մշակում է առաջարկներ «Նաիրիտի» տարաների, որոշ նյութերի մեկուսացման շուրջ: Անկախ նրանից, թե «Նաիրիտն» ինչ ճակատագիր կունենա, խումբը քայլեր է ձեռնարկում, որ կարողանա անվտանգությունն ապահովել:
«Մենք նույնիսկ առաջարկություն ենք պատրաստել, որ, կարելի է, օրինակ՝ գետինը փորել և այդ հորիզոնական դիրքում գտնվող տարաները դնել, այնտեղ համապատասխան պայմաններ ստեղծել և բետոնապատել, որ հետագայում խնդիր չառաջանա: Հնարավոր է՝ հրդեհն ավելի շուտ ծագեց, քան այն միջոցառումը, որ պիտի իրականացվեր: Այն, որ մոտեցումներ կան արդեն, պետք է որոշումներ ընդունվեին, միանշանակ է»,-ասել է ՓԾ տնօրենի տեղակալը:










