Հայաստանում անհրաժեշտ է Ճարտարապետների պալատ ունենալ, կարգավորելու բազմաթիվ հարցեր կան. ճարտարապետներ
ՀՀ ազգային ժողովում քննարկվում է Հայաստանում ճարտարապետների պալատ ստեղծելու նախագիծը: Այն լինելու է ինքնակարգավորվող մարմին, որը որակավորում է տրամադրելու ճարտարապետներին:
Քննարկվող նախագծի, ոլորտի չկարգավորվող մասի վերաբերյալ Tert.am-ը զրուցեց ճարտարապետներ Բորիս Քոչարյանի և Արսեն Կարապետյանի հետ:
«Աշխարհի բոլոր զարգացած երկրներում կան ճարտարապետության ոլորտում գործունեությունը կարգավորող մարմիններ, որտեղ մասնագետները որակավորում են տրամադրում իրենց գործընկերներին: Սրանից ելնելով՝ մեր՝ ճարտարապետներիս կարծիքը միանշանակ է՝ նման պալատի անհրաժեշտություն կա: Նման կառույց ստեղծվել է նաև Ռուսաստանում ու Բելառուսում: Մեզ օր առաջ անհրաժեշտ է նման կառույց ունենալ, որը կկարգավորի այն հարաբերությունները, որոնք որևէ այլ մարմին կարգավորելու ֆունկցիա չունի, իսկ կարգավորելու բազմաթիվ հարցեր կան՝ սկսած մասնագիտական որակից մինչև էթիկայի նորմեր»,-ասաց Բորիս Քոչարյանը:
Նա նշեց, որ այժմ այդ և այլ հարցերը կարգավորվում են գործող օրենքների շրջանակներում, ինչը բավարար չէ: Քոչարյանի խոսքով՝ կան թերություններ, կան հարցեր, որոնք չկարգավորված լինելու հետևանք են:
«Համոզված ենք, որ նման կառույց մի օր ունենալու ենք, սակայն լավ կլինի հիմա ունենալ: Թե ինչ կլինի Ազգային ժողովում քննարկումից հետո, կտեսնենք: Այնուամենայնիվ, մասնագետներին համակարգել է պետք: Հասարակական, սոցիալական, մասնավոր պատվերի հետ հարցերը կարգավորման կարիք ունեն: Բացի դրանից՝ այժմ չկա կառույց, որը կզբաղվի ճարտարապետների մշտական կրթությամբ, որակավորման բարձրացմամբ»,-ասաց Քոչարյանը՝ հավելելով, որ կառույցը կլինի ինքնակարգավորվող:
Հարցին՝ ի՞նչ երաշխիքներ կան, որ կառույցը կկարողանա լինել ինքնակարգավորվող, Քոչարյանը պատասխանեց, որ երաշխիքներն ու պատասխանատվության հարցը սահմանվելու են օրենքով:
Ճարտարապետ Արսեն Կարապետյանը Tert.am -ի հետ զրույցում նշեց, որ միանշանակ է, որ նման օրենք Հայաստանին պետք է, քանի որ երկու ձեռքով կողմ է, որ լինեն արտոնագիր ունեցող ճարտարապետներ:
«Թե ինչպես է իրականացվելու այն, չեմ ուսումնասիրել, խոսքս ներկայումս քննարկվող օրինագծի մասին է»,-պարզաբանեց ճարտարապետը:
Ինչ վերաբերում է կանխատեսումներին, թե այն հնարավոր է՝ դառնա «սուպեր» ուժային կառույց, Կարապետյանը նշեց, որ նման մտավախություններ կարող են լինել, բայց դա արդեն երկրորդ հարցն է:
Ինչ վերաբերում է օրենքի քննարկման ժամանակ պատգամավորների տարաբնույթ դիտարկումներին, թե փոխվել է քաղաքի ճարտարապետական դեմքը (ավելին՝ Վարդան Բոստանջյանը Հանրապետության հրապարակն անգամ համեմատեց քրդի թումբանի հետ), Արսեն Կարապետյանը նշեց, որ դրանք անիմաստ և ոչ մասնագիտական քննարկումներ են, որևէ կապ չունեն տվյալ նախագծի հետ:
«Այդ անճոռնին, ոչ անճոռնին այս օրենքի կոնտեքստում չպետք է քննարկվի»,- ասաց նա:










