«Եթե շեղվեն միջոցառման օրակարգից, մենք ավելի քան պատրաստ ենք համարժեք պատասխանների». Արմեն Աշոտյանը՝ Բաքու մեկնելու մասին
Հոգեբանական որևէ խնդիր չունենք չգնալու Բաքու և չմասնակցելու Եվրանեսթ ԽՎ -ի շրջանակներում կազմակերպվող այս կարևոր միջոցառմանը. Tert.am-ի հետ զրույցում ասաց ՀՀ պատվիրակության ղեկավար, ՀՀ Ազգային ժողովի արտաքին հարաբերությունների մշտական հանձնաժողովի նախագահ Արմեն Աշոտյանը:
Նշենք, որ Եվրանեսթ ԽՎ-ում ՀՀ ԱԺ պատվիրակության անդամներ Արմեն Աշոտյանը և Մանե Թանդիլյանը վաղը՝ սեպտեմբերի 21-ին կմեկնեն Բաքու՝ մասնակցելու Եվրանեսթ ԽՎ-ի սոցիալական, կրթության, մշակույթի և քաղաքացիական հասարակության հարցերի հանձնաժողովի կողմից կազմակերպված համաժողովին՝ նվիրված կանանց առողջության և գենդերային հավասարության խթանմանը:
Արմեն Աշոտյանը նշեց, որ տրված անվտանգության երաշխիքները բավարար են համարել մեկնելու համար: «Անվտանգության երաշխիքներ տրվել են Ադրբեջանի Ազգային ժողովի կողմից: Միջոցառմանը մեր մասնակցության մասին տեղեկացվել է վաղօրոք, ադրբեջանական կողմին փոխանցվել է մեր մեկնման և ժամանման մասին համապատասխան մանրամասները: Որոշակի խնդիրներ եղան հյուրանոցի հարցում, բայց այնուհանդերձ լուծվեցին և սենյակների համապատասխան ամրագրումն արված է»,-ասաց Աշոտյանը:
ՀՀ ԱԺ պատգամավորը նշեց, որ դեռևս Ստրասբուրգում Եվրանեսթի ԽՎ բյուրոյի նիստի ժամանակ առիթ է ունեցել խոսել ադրբեջանցի իր գործընկերոջ հետ՝ ներկայացնելով միջոցառմանը մասնակցելու ցանկության մասին: «Հույս հայտնեցի, որ որևէ խոչընդոտ չի լինի մեր մասնակցության համար, ստացա լրացուցիչ հավաստումներ ադրբեջանական պատվիրակության ղեկավարի կողմից, որ ամեն ինչ կկազմակերպվի այնպես, ինչպես մյուս մասնակիցների համար»,-ասաց նա:
Արմեն Աշոտյանի խոսքով՝ սեպտեմբերի 22-ն ամբողջությամբ՝ մինչև երեկո կլինի աշխատանքային օր, իսկ թեման բավական կարևոր է: «Թեման ՄԱԿ-ի նպատակների շրջանակներում Արևելյան գործընկերության երկրների համար արդիական է: ՀՀ-ն կատարած աշխատանքների մեծ փաթեթ ունի և այդ նպատակներին հասնելու համար աշխատում ենք նաև գործադիր իշխանության հետ: Գենդերային հավասարության և կանանց առողջության հետ կապված զեկույցը կներկայացնի Մանե Թանդիլյանը, նաև խորհրդարանում կանանց ընդգրկվածության և անելիքներին կանդրադառնա»,-ասաց նա և հավելեց, որ այսօր Մանեի Թանդիլյանի հետ քննարկել ենք նախապատրաստական աշխատանքների վերջին փուլը:
Արմեն Աշոտյանը հույս հայտնեց, որ կազմակերպիչները նախապես հաստատված օրակարգից չեն շեղվի: «Հուսամ, որ կազմակերպիչները չեն շեղվի նախապես հայտարարված օրակարգից և ծրագրից, իսկ շեղվելու դեպքում մեր պատվիրակությունն ավելի քան պատրաստ է համարժեք արձագանքումների և հակազդումների համար»,-ասաց նա:
Հայտագրված մասնակիցների ցանկն ըստ նրա՝ բավական մեծ է, կան ԵԽ պատգամավորներ, այդ թվում այնտեղ կլինի նաև ԵԽ-Հարավային Կովկաս համագործակցության ղեկավարը: «Սա լավ առիթ կլինի նաև նրա հետ խոսել, որովհետև ԵԽ-Հարավային Կովկաս համագործակցության ղեկավարը նաև համանախագահում է ՀՀ-ԵՄ խորհրդարանական ձևաչափին: Կլինեն այլ երկրների պատվիրակներ, դեսպանատների, միջազգային կազմակերպությունների ներկայացուցիչներ. մենք տրամադրված ենք բովանդակային և հետաքրքիր աշխատանքի»,-ասաց նա:










