Բանակցություններին խոչընդոտում են հիմնականում Ադրբեջանի առավելապաշտական և ոչ իրատեսական ակնկալիքները դրանց ելքից. Սերժ Սարգսյան

17:02 • 24.01.18

Ե՛վ հայերը, և՛ ադրբեջանցիները ցանկանում են, որպեսզի Լեռնային Ղարաբաղի հակամարտությունը հնարավորինս շուտ  ավարտվի, բայց այստեղ խնդիրն այն է, որ այդ ցանկությունների միջև գերհսկայական տարբերություն կա:

Այս մասին Եվրոպայի խորհրդի խորհրդարանական վեհաժողովի ձմեռային նստաշրջանում պատասխանելով գերմանացի պատվիրակի` հակամարտության լուծման վերաբերյալ հարցին, ասաց ՀՀ Նախագահ Սերժ Սարգսյանը:

«Ի՞նչ կարող եք դուք անել, ի՞նչ կարող է անել միջազգային հանրությունը: Ես կարծում եմ, որ բանակցությունների խոչընդոտը հիմնականում հանդիսանում է Ադրբեջանի առավելապաշտական և ոչ իրատեսական ակնկալիքները բանակցությունների ելքից: Եթե միջազգային հանրությունը կարողանա օգնել Ադրբեջանին ազատվելու պատրանքներից և գալու իրատեսական դաշտ, ապա մենք, կարծում եմ, կարճ ժամանակում կարող ենք հասնել մեծ հաջողությունների: Իրոք, այս կոնֆլիկտը խոչընդոտում է մեր ժողովուրդների զարգացմանը, խլում է  մարդկային կյանքեր, մեծ նյութական ռեսուրսներ, և իրոք անհրաժեշտություն կա, որպեսզի այս հակամարտությունը կլուծվի»,-ասաց Նախագահը:

Սերժ Սարգսյանի խոսքով՝ բանակցային պրոցեսին խոչընդոտում է նաև այն հանգամանքը, որ  ձեռք բերված պայմանավորվածությունները չեն կատարվում.« Ինչպես գիտեք 2016 թվականին Ադրբեջանը լայնամասշտաբ ռազմական գործողություններ ձեռնարկեց` նպատակ ունենալով զենքի ուժով իր կազմ վերադարձնել Լեռնային Ղարաբաղը:

Դրանից հետո մենք ունեցանք հանդիպումներ Վիեննայում, Սանկտ Պետերբուրգում, այնուհետև Ժնևում, և այդ հանդիպումներին առաջին երկուսին գոնե մասնակցում էին շատ բարձր մակարդակով պաշտոնյաներ, միջնորդներ՝ համանախագահող երկրներից: Մենք եկանք պայմանավորվածության, որ բանակցությունները շարունակելու լավագույն միջոցը վստահության որոշակի էլեմենտներ ստեղծելն է, և այդ առումով որոշեցինք ստեղծել հրադադարի խախտումների հետաքննման միջազգային մեխանիզմ, ընդլայնել ԵԱՀԿ նախագահի անձնական ներկայացուցչի լիազորությունները և գործիքակազմը, թուլացնել լարվածությունը, բայց, ցավոք, դա տեղի չունեցավ»:

Թե ինչո՞ւ չիրականացան պայմանավորվածությունները, Սերժ Սարգսյանն ասաց, որ  հանդիպումներից անմիջապես հետո Ադրբեջանի ամենաբարձր պաշտոնական բերանից հնչեց այն հայտարարությունը,  որ դա իրենց հայտարարությունը չէ, դրանք համանախագահների հայտարարություններն են, և որ Լեռնային Ղարաբաղի խնդիրն իրենց ներքին գործն է:

«Այսպիսի պարագաներում,իհարկե, ակնկալել շուտափույթ լուծում կամ բանակցությունների ինտենսիվ  առաջխաղացում, իրատեսական չէ: Պատասխանելով Ձեր հարցին` ասեմ, որ մենք խնդրում ենք բոլորին՝ կողմերին բերել իրատեսական դաշտ»,-եզրափակեց Նախագահը: