Ժողովրդի համար հաճելի քայլեր անելը լավ բան է, բայց դեռ չի նշանակում բարեփոխումների հաջող ընթացքի ապահովում. Վարդան Բոստանջյան

Տնտեսագետ, նախկին պատգամավոր Վարդան Բոստանջյանը գտնում է, որ ՀՀ վարչապետ Նիկոլ Փաշինյանի այն հայտարարությունը, թե բարեփոխումները ժողովրդի համաձայնությամբ պետք է իրականացնել, մի փոքր անհասկանալի է: 

«Ժողովուրդն ընդհանրապես ունենում է սոցիալական բնույթի խնդիրներ, որոնք, ըստ էության, չափազանց ակնհայտ ու պարզ են՝ աշխատանք, վարձատրություն և գործունեություն ծավալելու հնարավորություն: Սոցիալ տնտեսական կյանքը այնքան բարդություն ունի, որ պետք է հանգամանալից ուսումնասիրել և դրանց հիման վրա քաղաքականություն մշակել: Ժողովրդի հետ քննարկել, նրա համար հաճելի քայլեր անելը լավ բան է, բայց դա դեռ չի նշանակում բարեփոխումների հաջող ընթացքի ապահովում:

Ժողովրդի հետ արդեն քննարկված է, նա հասկանում է հնարավորինս էժան գնով սպառել գազ, էլեկտրաէներգիա»,-Tert.am-ի հետ զրույցում ասաց նա և կարևորեց բարեփոխումները մասնագիտական հենքի վրա իրականացնելը:

Ամեն դեպքում, Վարդան Բոստանջյանը կարևորեց և դրական համարեց, որ ներկայումս հանրապետությունում գոյություն ունի բավական զգաստ վիճակ` գողության, թալանի առումով: «Իհարկե, դա լավ է, բայց կնճռոտ խնդիրների լուծում է անհրաժեշտ, իսկ դրանք լուծում են մարդիկ, ովքեր մասնագետ են: Ինչպե՞ս կարող է ցանկացած հանդիպած մարդ խնդիր լուծել»,-ասաց նա:

Վարդան Բոստանջյանը նշեց, որ երեք կամ չորս ամսվա ընթացքում տնտեսությունում նկատելի հաջողություն ունենալը ջրի վրա գրած մի բան է:  «Ես կարծում եմ, որ լավագույն դեպքում հաջողությունների շեմը`ինստիտուցիոնալ, իրավական առումներով, կարող ենք տրորել առնվազն երեք տարի հետ: Բնակիչերին, միամիտ մոտեցումներ ունեցողներին պետք  է ասել, որ չսպասեն, թե վաղը միանգամից երջանկության մեջ են գտնվելու` թե՛ աշխատանքի, թե՛ եկամուտի, թե՛ կենսաթոշակի առումով»,-ասաց նա:

Տնտեսագետը նշեց, որ ժամանակը պատասխան կտա բարեփոխումների, կադրային քաղաքականության վերաբերյալ: «Ես լիրիկական պահեր եմ նկատում. ովքեր մասնակցել են հեղափոխական շարժմանը, նրանց հանձնարարվում են այնպիսի գործեր, որոնք ամենայն հավանականությամբ ի զորու չեն անելու: Մենք օգնած կլինենք ասելով Նիկոլ Փաշինյանին` վարել ճիշտ կադրային քաղաքականություն: Իմ կարծիքով՝ այն կադրերի վրա, որոնց մեջքին ծանր բեռ է դրված, չեն էլ իմանում այդ բեռի չափը, որովհետ կշեռքի ինստիտուտի, բեռի ծանրության վերաբերյալ, իմ կարծիքով, խորը պատկերացումներ չունեն»,- ասաց նա: