Հայտնի է՝ ովքեր են հավակնում Եվրոպայի խորհրդի գլխավոր քարտուղարի պաշտոնին
Հայտնի են Եվրոպայի խորհրդի գլխավոր քարտուղարի պաշտոնի թեկնածուները: Վերջին րոպեին թեկնածուների ցանկին ավելացել են ևս երկուսը, գրում է «ՌԻԱ Նովոստի» գործակալությունը:
Մինչ հունվարի 10-ը հայտնի էր երկու թեկնածուի՝ Բելգիայի արտգործնախարար Դիդյե Ռեյնդերսի և Լիտվայի նախկին վարչապետ Անդրյուս Կուբիլյուսի մասին:
Բելգիայի ԱԳՆ ղեկավարի աշխատակազմում հաստատել են թեկնածության առաջադրման մասին տեղեկությունը:
«ՌԻԱ Նովոստի» գործակալության տվյալներով՝ թեկնածությունների ներկայացման «դեդլայնից» ժամեր առաջ թեկնածություն է ներկայացրել ևս 2 հոգի՝ Խորվաթիայի ԱԳ նախարար Մարիա Պեյչինովիչ-Բուրիչը և հույն քաղաքական գործիչ Դորա Բակոյանին:
Եվրոպայի խորհրդի գլխավոր քարտուղարն ընտրվում է ԵԽԽՎ-ում ձայների մեծամասնությամբ, 5 տարի ժամկետով՝ վերընտրման հնարավորությամբ:
Վեհաժողովում թեկնածությունների վերաբերյալ առաջին խորհրդակցությունը կանցկացվի հունվարին: Կանոնադրական մարմնում՝ ԱԳ նախարարների կոմիտեում, թեկնածուների ներկայացումն ու քվեարկությունը տեղի կունենա փետրվարին, այնուհետ թեկնածուների վերջնական ցանկը կուղարկվի ԵԽԽՎ: Հունիսյան նստաշրջանի շրջանակում էլ տեղի կունենա քվեարկությունը:
Նշենք, որ այժմ Եվրոպայի խորհրդի գլխավոր քարտուղարն է Թյորբյորն Յագլանդը:











