Ինդոնեզիայում 2018 թվականին ավելի քան 11 500 երկրաշարժ է տեղի ունեցել

13:00 • 11.01.19

Ինդոնեզիայում երկրաշարժերի թիվը 2018 թվականին զգալի ավելացել է և կազմել ավելի քան 11 500, հայտնում է «ՌԻԱ նովոստի» գործակալությունը՝ Հիդրոօդերևութաբանության, կլիմայագիտության ու երկրաֆիզիկայի ազգային վարչությանը (BMKG) հղումով:


BMKG տվյալների համաձայն՝ 2017 թվականին գրանցվել է 7 172 ստորգետնյա ցնցում, իսկ 2018-ին՝ տարբեր ուժգնության 11 577 երկրաշարժ: Նշվում է, որ ավելի քան 5 մագնիտուդ ուժգնության երկրաշարժերի թիվը 297 է:


Ավելի վաղ հաղորդվել էր, որ Ինդոնեզիայում 2018-ին տեղի ունեցած տարերային աղետների հետևանքով զոհերի կամ անհետ կորածների թիվն ամենաբարձրն է վերջին տասնամյակում: Հաղորդվում է, որ զոհերի թիվը 4 231 է և ամենաբարձրը 2007 թվականից ի վեր: