ԱԱԾ-ն այն սպեցիֆիկ գերատեսչությունն է, որը պիտի լինի անձամբ վարչապետի ենթակայության տակ․ Արարատ Միրզոյան
ԱԺ նորընտիր նախագահ Արարատ Միրզոյանը չի հիշում, թե ինքն ընդդիմություն եղած ժամանակ ասել է, որ ԱԱԾ-ն պիտի վարչապետի ենթակայությունից դուրս գա ու լինի Կառավարության ենթակայության տակ։ Նա ԱԺ-ում լրագրողների հետ զրույցում ասաց, թե ԱԱԾ-ն բավականին յուրահատուկ կառույց է։
«Ես այդպիսի պնդում չեմ հիշում, ինչպես նախկինում, այնպես էլ հիմա, կարծում եմ, որ ԱԱԾ-ն այն սպեցիֆիկ գերատեսչությունն է, որը պիտի լինի անձամբ վարչապետի ենթակայության տակ, բայց այլ է վերաբերմունքս ոստիկանության հարցում։
Համոզմունք չունեմ, որ պիտի լինի կառավարության ենթակայության տակ, բայց կարծում եմ, որ այս թեման բավականին բաց է քննարկման համար»,- ընդգծեց Արարատ Միրզոյանը։
ԱԺ նախագահը խոսեց նաև ԱԺ աշխատակազմի ղեկավարի պաշտոնի մասին։ Նա ո՛չ հերքեց, ո՛չ հաստատեց Վահան Կոստանյանի՝ այդ պաշտոնը զբաղեցնելու հնարավորությունը․ «Աշխատակազմի ղեկավարի թեկնածուին առաջիկայում կհայտնենք»,- շարունակեց Միրզոյանը։
Ինչ վերաբերում է ԱԺ աշխատակազմում անհրաժեշտ փոփոխություններին, նա շեշտեց, որ ինչպես ընդդիմադիր եղած ժամանակ, այնպես էլ հիմա շարունակում է պնդել, որ աշխատակազմի փորձագիտական լուրջ կենտրոն ստեղծելու և լուրջ մասնագետներ հրավիրելու կարիք կա։










