Եղանակն՝ այսօր
Ես տանն եմ, ձերբակալված չեմ, միակ ճշմարտությունն այն է, որ ես ազատվել եմ պաշտոնից. Ոստիկանության արդեն նախկին ծառայող
Ես ձերբակալված չեմ։ Այդ մասին հրապարակումներն անհիմն են ու կեղծ։ Այս մասին Tert.am-ի հետ զրույցում ասաց ՀՀ ոստիկանության պետ Վալերիյ Օսիպյանի հրամանով աշխատանքից ազատված ծառայողը՝ Գոռ Հակոբյանը՝ պատասխանելով հարցին, թե մի քանի հրապարակում կա, որտեղ նշվում է, որ ինքը մեղադրվում է կաշառք վերցնելու մեջ և ձեբակալված է։
«Դրանք չեն համապատասխանում իրականությանը։ Ես հիմա գտնվում եմ մեր տանը՝ երեխաներիս հետ։ Այս հրապարակումների մեջ միակ ճիշտ բանն այն է, որ ես ազատվել եմ ՀՀ ոստիկանությունում զբաղեցրած պաշտոնից», - ասաց Գոռ Հակոբյանը։
Հարցին, թե այդ դեպքում ինչո՞ւ է ազատվել զբաղեցրած պաշտոնից, Գոռ Հակոբյանն ասաց, որ ՀՀ ոստիկանության պետը տասնյակ նշանակումներ և ազատումներ է կատարում։
«Խնդրում եմ լրատվամիջոցներին իմ անվան հետ որևէ կեղծ շահարկում չանել, սա նման է լավ կազմակերպած շոուի, և այսքանը, այլ բան չեմ կարող ասել», - եզրափակեց ոստիկանապետի աշխատակազմի նախկին ծառայողը։
Նշենք, որ «Հրապարակ» օրաթերթը գրել էր, որ Գոռ Հակոբյանը մեղադրվում էր կաշառք վերցնելու մեջ և ԱԱԾ-ն ձերբակալել է նրան: Նույն աղբյուրը նշում էր,որ ձերբակալման մասին լուրն ԱԱԾ-ն հերքել է։
Studio One