Թուրքիայում և աշխարհի տարբեր երկրներում կոգեկոչեն պոլսահայ լրագրող Հրանտ Դինքի հիշատակը

11:25 • 17.01.19

Թուրքիայի մի շարք քաղաքներում և աշխարհի տարբեր երկրներում կոգեկոչեն պոլսահայ լրագրող և մտավորական, «Ակօս» հայկական թերթի հիմնադիր ու նախկին խմբագիր Հրանտ Դինքի հիշատակը:

Ինչպես փոխանցում է «Ակօս»-ը, հունվարի 17-19-ը Դինքի մահվան 12-րդ տարելիցին նվիրված միջոցառումներ կանցկացվեն Ստամբուլում, Անկարայում և Դատչայում, Գերմանիայի Բեռլին և Քյոլն քաղաքներում, ԱՄՆ Լոս Անջելես քաղաքում և Բելգիայի մայրաքաղաք Բրյուսելում:

Ավանդույթի համաձայն՝ Դինքի հիշատակին երթ կանցկացվի Հրանտ Դինքի սպանության վայրում՝ Ստամբուլի Շիշլի շրջանի Օսմանբեյ պողոտայում գտնվող «Ակօս»-ի նախկին խմբագրատան դիմաց: Այն կանցկացվի նույն ժամին՝ 15:05-ին: Նույն օրը Ստամբուլի կենտրոնական Բեյօղլու շրջանի «Հանջը» համերգային սրահում Դինքի հիշատակին հայկական երաժշտության երեկո է սպասվում:

Դինքի հիշատակին ծրագրվում են նաև բազմաթիվ սեմինարներ, բաց քննարկումներ, կինոդիտումներ և հիշատակի այլ միջոցառումներ, որոնց կմասնակցեն ինչպես հայ, այնպես էլ թուրք և այլազգի իրավապաշտպաններ, մտավորականներ, հասարակական, քաղաքական ու մշակութային գործիչներ:

Հիշեցնենք, որ Հրանտ Դինքը սպանվել է թուրք ազգայնականի կրակոցից 2007 թվականի հունվարի 19-ին՝ իր խմբագրատան դիմաց: