Պետգույքի կառավարման կոմիտեն վերջին շրջանում նվիրատվություններ չի ստացել. Պետգույքի կառավարման կոմիտեի նախագահ
Պետական գույքի կառավարման կոմիտեն վերջին շրջանում նվիրատվություններ չի ստացել։ Այսօր Կառավարությունում լրագրողների հետ ճեպազրույցում նման հայտարարություն արեց Պետգույքի կառավարման կոմիտեի նախագահ Նարեկ Բաբայանը։ Ինչ վերաբերում է Մանվել Գրիգորյանի նվիրատվությանը, Բաբայանը տեղեկացեց, որ գույքի ընդունման գործընթացը դեռևս չի ավարտվել։
«Պետության կողմից նվիրատվություն ընդունելու դեպքում կառավարության որոշում կլինի, բնականաբար, բոլորդ կիմանաք այդ մասին»,-ասաց նա՝ հավելելով, որ այս գործընթացը կասեցված է, քանի որ դատախազությունը վերապահումներ է հայտնել։
Նարեկ Բաբայանը, խոսելով Արմեն Ավետիսյանի ընտանիքին պատկանող «Գոլդեն փելըս» հյուրանոցի՝ պետությանը նվիրաբերելուն, շեշտեց, թե այս պահին տնօրինում են Ավետիսյանները․ «Այս հարցով նույնպես կառավարության որոշում կլինի», - շարունակեց Նարեկ Բաբայանը։
Միևնույն ժամանակ վերջինս հերքեց մամուլում շրջանառվող լուրերը, թե «Գոլդեն փելըս» հյուրանոցն այս պահին ղեկավարում է Հրազդանի քաղաքապետ Սևակ Միքայելյանը՝ ԱԺ պատգամավոր Սասուն Միքայելյանի որդին։ Ըստ նրա՝ դեռևս ուսումնասիրված չէ հարցը՝ արդյոք «Գոլդեն փելըս»-ը որևէ պարտք ունի՞ կամ գրավադրվա՞ծ է, թե ոչ։
Պետգույքի ղեկավարն անդրադարձավ նաև պետական ապարատի աշխատակիցների պարգևավճարներին և նշեց, որ իրենց աշխատակիցներն էլ մինչև 1 դրույքի չափով պարգևատրվել են։ Հարցին՝ ինքներդ Ձեզ պարգևատրե՞լ եք, Նարեկ Բաբայանը պատասխանեց․ «Ես իրավասու չեմ ինքս ինձ պարգևատրելու»։










