Ամբողջական պայմանագրային ծառայության անցնելու համար այսօր ոչ մի պայման առկա չէ. Դավիթ Տոնոյան (տեսանյութ)
Ամբողջական պայմանագրային ծառայության անցնելու համար այսօր ոչ մի պայման առկա չէ. Եռաբլուրում լրագրողների հետ զրույցում ասաց պաշտպանության նախարար Դավիթ Տոնոյանը: Ըստ նրա՝ բանակը այլ տարբերակ չունի, քան ժամկետային և պայմանագրային զինծառայողների ծառայության փոխլրացումը:
«ԶՈՒ-ն այսօր մեծաքանակ է, և մենք ստիպված ենք դիմագրավելու համապատասխան մարտահրավերներին, որոնք շարունակական են: Մենք պետք է ունենանք միջազգային չափանիշներին համապատասխան բանակ, այդ պատճառով անելու ենք ամեն ինչ, որ փոխլրացման համակարգ գործի, այլ տարբերակ չունենք»,-ասաց նա:
Ըստ Պաշտպանության նախարարի՝ ամեն ինչ արվում է բոլոր խնդիրները հաղթահարելու համար: «Հավատացեք, անում ենք առավել, քան հնարավոր է, քան պատկերացնում եք, մենք ԶՈՒ մարտունակությունը պատշաճ ձևով ենք պահելու»,-ասաց նա:
Հարցին, թե շա՞տ են զինվորական ծառայությունից ազատվողները, ինչպես ժամանակին ասում էր ՀՀ վարչապետ Նիկոլ Փաշինյանը, երբ ընդդիմադիր պատգամավոր էր, Տոնոյանը նշեց, որ Կառավարության որոշումներով կարգավորվել է այդ հարցը: «Մենք հիմա սահմանափակումներով ավելի շատ զինծառայողներ ենք զորակոչում, որը ևս խնդրահարույց է, մենք ամեն ինչ պետք է անենք, որ ԶՈՒ-ում ծառայեն իրականում առողջները, իսկ մարտական խնդիրները կատարելու համար պետք է լինի հպարտություն՝ և՛ ծնողների, և´ այն զինվորականների համար, որոնք իրականում առողջ են: Այն զինվորները, որոնք ունենում են սահմանափակումներ, այս տարվա ընթացքում փորձելու ենք իրենց համար ծառայության այլ միջոցներ գտնել»,-ասաց նա:
Հարցին, թե տեղի՞ն են ՀԿ-ներից մեկի դիտարկումները, թե բանակում կրիմինալ մթնոլորտը շարունակվում է, Դավիթ Տոնոյանը պատասխանեց. «Ես չեմ կարող բացառել, որ միջանձնային հարաբերություններում չեն լինում այդպիսի դրվագներ, 18-27 տարեկան տղաներ են, ամեն ինչ արվում է, որ իրենց կարգապահությունը բարձրացվի, միջանձնային հարաբերությունների բարձր որակը հաստատվի, բայց լինում են, իհարկե, դեպքեր: Ինչ վերաբերում է կրիմինալին, ապա դրա դեմ պայքար է գնում, չեն լինելու ոչ մի ինքնակոչ առաջնորդներ, այդ իսկ պատճառով և սերժանտական կազմի գործունեությունն ենք բարձրացնում և կրտսեր սերժանտական կազմի»,-ասաց նա:










