Պարգևավճարները ԶՈՒ-ում առաջին հերթին տրամադրվել է մարտական հերթապահության մեջ ընդգրկված անձնակազմին, ընդ որում, երկու անգամ. նախարար
Բանակի օրվա առիթով Եռաբլուրում գտնվող ՀՀ պաշտպանության նախարար Դավիթ Տոնոյանից լրագրողները հետարքրքվեցին, թե ՊՆ-ում պարգևավճարներ եղե՞լ են:
Նախարարն ասաց, որ անցյալ տարվա ընթացքում բավական մեծ գումար են տրամադրել պարգևավճարների համար, որոնք գոյացել են խնայումներից, չենք ուղղել ինչ-ինչ ձեռքբերումների, այլ տրամադրվել են անձնակազմին՝ որպես հավելավճար: Առաջին հերթին տրամադրվել է մարտական հերթապահության մեջ ընդգրկված անձնակազմին, ընդ որում երկու անգամ»,-ասաց նա:
Իսկ թե համաձա՞յն է արդյոք պաշտպանության նախկին նախարար Սեյրան Օհանյանի դիտարկմանը, թե որոշ քրեական գործեր ԶՈՒ-ին հարվածում են, նախարարը պատասխանեց. «Իհարկե, լինում են, որ ԶՈՒ-ի տրամադրության վրա դա ազդում է, բայց մենք, ինչպես ասացի, հաղթահարում ենք և անում ենք առավելագույնը»:
Հարցին, թե հաշվի առնելով, որ նրա տղան ևս ծառայում է հայոց բանակում, լսո՞ւմ է նրանից, թե ինչ խնդիրներ կան Զինված ուժերում, նախարարը նշեց, որ իրենց հարաբերություններում ինքն աշխատում է լինել որպես ծնող և ոչ թե նախարար: Թեև նշեց, որ երեկ, երբ ԶՈՒ-ում ծառայող տղային շնորհավորել է, ասել է՝ պարոն կրտսեր սերժանտ, շնորհավորում են Ձեզ, որդին պատասխանել է՝ շնորհակալ եմ, պարոն նախարար: «Այսպիսի հարաբերություներ են հիմա իմ և նրա միջև: Իհարկե, որոշակի տեղեկություն ստանալուց որոշում եմ արձագանքել»:
Նախարարը նաև իր մաղթանքը փոխանցեց. «ԶՈՒ կազմին մաղթում եմ լավ տրամադրություն, զգոնությունը չկորցնեն և հանդարտ հոգով ու անսասան հավատով կշարժվենք առաջ»:










