Ադրբեջանի առողջապահության նախարարությունը հաստատել է երկրում H1N1 վիրուսի առկայությունը

13:14 • 01.02.19

Ադրբեջանի գլխավոր համաճարակաբան Իբադուլա Աղաևն այսօր հայտարարել է, որ երկրում 16 մարդու մոտ գրիպի H1N1 վիրուս է ախտորոշվել, գրում է Minval.az գործակալությունը:

Աղաևը նշել է, որ այդ քաղաքացիների մոտ վիրուսի առկայությունը հաստատված է հանրապետության առողջապահության նախարարության հակահամաճարակային կայանի, ինչպես նաև Առողջապահության համաշխարհային կազմակերպության (ԱՀԿ) կողմից:

Ադրբեջանում ԱՀԿ ներկայացուցիչ Հանդե Հարմանջին պարզաբանել է, որ, չնայած H1N1 վիրուսն առկա է, այն «խոզի գրիպ» չի համարվում:

«Աշխարհում հիմա, ինչպես և ամեն տարի, տարածված են սեզոնային գրիպները (A/H1N1)»,- ասել է նա՝ ընդգծելով, որ այդ վիրուսն այլևս խոզի գրիպ չի համարվում, քանի որ այժմ սկսել է փոխանցվել մարդուց մարդուն և սեզոնային գրիպների շարքին է դասվում: