Ռուսաստանցիների 45%-ը կարծում է, որ երկիրը շարժվում է սխալ ուղղությամբ
Ռուսաստանցիների 45 տոկոսը կարծում է, որ երկիրը շարժվում է ոչ ճիշտ ուղղությամբ: Այդ մասին պարզ է դարձել «Լևադա կենտրոն» վերլուծական կենտրոնի անցկացրած հարցման արդյունքում, փոխանցում է «Эхо Москвы» ռադիոկայանը:
Հայտնի է, որ տվյալ ցուցանիշն ամենաբարձրն է վերջին 12 տարվա ընթացքում:
Ռուսաստանի նախագահ Վլադիմիր Պուտինի՝ այդ պաշտոնում գտնվելը հավանության է արժանացնում ռուսաստանցիների 64 տոկոսը:
Մինչդեռ Հանրային կարծիքի ուսումնասիրման համառուսաստանյան կենտրոնի (ВЦИОМ) տվյալներով՝ նախագահի հանդեպ վստահության մակարդակը հասարակության շրջանում նվազել է մինչև 33 տոկոս:
Ինչպես ավելի վաղ հայտնել է tert.am-ը, ВЦИОМ-ն օրեր առաջ հրապարակել էր տվյալներ, ըստ որոնց Պուտինի աշխատանքը դրական է գնահատում ռուսաստանցիների միայն 62,1 տոկոսը, իսկ վարչապետի ու կառավարության աշխատանքը՝ համապատասխանաբար 35 և 39,5 տոկոսը:
Միևնույն ժամանակ «ФОМ» հետազոտական կենտրոնի անցկացրած հարցման տվյալները ցույց են տվել, որ ռուսաստանցիների մոտ 54 տոկոսը վերջին շրջանում դժգոհություն է ունեցել իշխանությունների գործելաոճից: 70 տոկոսն էլ խոստովանել է, որ վերջին ամսում իրենց շրջապատում բավականին շատ են լսել դժգոհություններ ու քննադատություններ՝ կապված իշխանությունների աշխատանքի հետ:










