Հայաստանում կորոնավիրուսի դեմ պայքարում իրականացված կանխարգելիչ միջոցառումները որևէ էական հաջողություն չունեցան, միայն վնասեցին պետությանը. համաճարակաբան
Մեր երկրում կորոնավիրուի դեմ պայքարում սահմանափակող միջոցառումները համաճարակի զսպման առումով որևէ էական հաջողություն չունեցան, միայն վնասեցին պետությանը և այսօր տարածաշրջանում առաջատար տեղ ենք զբաղեցնում։ Այս մասին Tert.am-ի հետ զրույցում նշեց համաճարակաբան Ռուբեն Հովհաննիսյանը:
Համաճարակաբանի կարծիքով՝ համաճարակի դեմ պայքարի ռազմավարության առումով շատ բացթողումներ են եղել: Ըստ նրա՝ նման դեպքերում պետք է մասնագետների հետ լուրջ քննարկումներ լինեին՝ հասկանալու համար սահմանափակումներն ի՞նչ խստությամբ պետք է իրականացվեին, որպեսզի վարակի տարածումը սկզբնական շրջանում զսպվեր:
Ռուբեն Հովհանիսյանն ընդգծեց, որ դիմակը որոշակի պաշտպանիչ ազդեցություն թողնում է, սակայն պետք է հաշվի առնել նաև դրա բացասական կողմերը: «Եթե շոգ եղանակին ամբողջ օրը դիմակով ես, դա կարող է հետագայում շատ այլ խնդիրներ առաջացնել, քանի որ բոլոր մարդկանց թոքերում կան պայմանական ախտածին միկրոօրգանիզմներ, որոնք կարող են ախտաբանական տարբեր խնդիրներ առաջացնել: Այդ առումով խիստ մտահոգություններ ունեմ, որ հնարավոր է հետագայում այլ պաթոլոգիաների վերելք ունենանք»,- նշեց Հովհաննիսյանը։
Նա անդրադարձավ նաև կորոնավիրուսի բուժման ընթացքում կիրառվող դեղամիջոցներին և նշեց, որ երկիրը այդ առումով թերացել է, շատ դեղորայքներ, որոնք այլ երկրներում չեն օգտագործվում, Հայաստանում շարունակում են կիրառել, ինչպես օրինակ «Պլակվենիլ» դեղամիջոցը, որը ԱՀԿ-ն արդեն հրաժարվել է կիրառելուց.
«Երբ հիվանդներին նշանակում են «Պլակվենիլ» դեղամիջոցը, տեղեկատվական թերթիկ են տալիս են, որ պացիենտը տեղյակ լինի այդ դեղամիջոցի բարդությունների մասին: Իմ կոլեգաների հետ զրուցելիս ես տեղեկանում եմ, որ շատ հաճախ կորոնավիրուսի հետևանքները այդքան բարդություն չեն ներկայացնում, որքան դեղամիջոցի առաջացած բարդությունները»:
Համաճարակաբանի խոսքով՝ իր դիտարկումները ցույց են տալիս, որ բնակչության զգալի մասը, որ կարիք ունի հետազոտվելու, ամիսներ շարունակ չի կարողանում հետազոտվել. «Իմ շրջապատում նկատում եմ թոքաբորբ ունեցողների, որոնք չեն հետազոտվում: Պետք է առողջապահական համակարգը նախապատրստվեր: Եթե այս տեմպերով շարունակվի, երբ եղանակները ցրտեն, հնարավոր է վարակի ուժգնացում լինի»:
Ռուբեն Հովհաննիսյանը նշում է, որ առկա է նաև տեղեկատվության պակաս. արդյոք բնակչության ամբողջ մասը վարակվելուն ունա՞կ է, թե՞ կա բնակչության մի շերտ, որ այսպես, թե այնպես չի վարակվելու: Նրա կարծիքով, հարկավոր է հնարավորինս շատ հետազոտություններ անել, քանի որ թեստավորումը կանխարգելիչ դեր ունի․ վարակված մարդն ավելի զգույշ է լինում շրջապատում:
«Մենք տեսնում ենք, որ նախարարության թույլտվությամբ միայն համապատասխան հզորություն ունեցող լաբորատորիաներն իրավունք ունեն ՊՇՌ մեթոդով ախտորոշում կատարելու և փոխանակ պետությունը աջակցեր նման լաբորատորիաներին թե՛ թեստերի, թե՛ ծառայություների գնելու առումով, նրանց հնարավորությունները սահմանափակում են, ինչը բերում է թեստավորումների քանակի սահմանափակմանը, ինչը մեր երկրին՝ օդի նման անհրաժեշտ է»,- նշեց նա:
Համաճարակաբանը նշեց նաև, որ ՁԻԱՀ-ի կենտրոնի աշխատանքից ազատված մասնագիտական խումբը մշտապես դիմել և իր աջակցությունն է հայտնել համավարակի դեմ պայքարում, սակայն նրանց հետ քննարկում չի եղել. «Մենք օպերատիվ կերպով մեկ-երկու շաբաթվա ընթացքում ռազմավարություններ մշակեցինք, կանխատեսումներ արեցինք, ներկայացրեցինք պարետին, ասեցին շնորհակալություն և հաջողություն: Սա էլ իրենց վերաբերմունքը մասնագիտական պոտենցիալի նկատմամբ։










