Ղրղզստանի նախկին նախագահ Աթամբաևին դատապարտել են 11 տարի 2 ամիս ազատազրկման. Աթամբաևին կզրկեն նաև պետական պարգևներից և ունեցվածքից

14:38 • 23.06.20

Բիշքեկի Մայիսմեկյան շրջանային դատարանը Ղրղզստանի նախկին նախագահ Ալմազբեկ Աթամբաևին դատապարտել է 11 տարի 2 ամիս ազատազրկման: Այս մասին տեղեկացնում է «ՌԻԱ Նովոստի» գործակալությունը:

Պետության նախկին ղեկավարը մեղավոր է ճանաչվել կոռուպցիայի համար՝ քրեական հեղինակություն Ազիզ Բատուկաևին ապօրինի ազատ արձակելու գործով:

Աթամբաևին կզրկեն նաև պետական պարգևներից և ունեցվածքից:

Դատարանը գործի քննությունը սկսել էր 2019 թվականի նոյեմբերին, դատական գործընթացը փակ էր անցկացվում: Նախկին նախագահը հրաժարվել էր լսումներին մասնակցելուց և վերջին խոսքի իրավունքից:

Աթամբաևը Ղրղզստանի նախագահ է եղել 2011-2017 թվականներին: Նա ընտրությունների արդյունքում իշխանությունը փոխանցել է Սոորոնբայ Ժեենբեկովին: