Քաղաքի մեջտեղում բացվում են փոսեր, ընդամենը ժապավենով են փակում, իսկ վերանորոգումը օրեր է տևում, սա անթույլատրելի է. Գայանե Մելքոմ Մելքոմյան (տեսանյութ)
Երևանի ավագանու «Իմ քայլը» խմբակցության անդամ Գայանե Մելքոմ Մելքոմյանը ավագանու նիստի ժամանակ քաղաքապետի ուշադրությունը հրավիրեց այն հանգամանքի վրա, որ հաճախ փողոցը վերանորոգելու նպատակով փողոցում փոս է փորվում և երկար ժամանակ չի այն վերանորոգվում:
«Խնդրում եմ անզիջում լինել: Դեպքեր ենք ունենում կենտրոնական փողոցում վերանորոգման համար փոս են փորում, հետագիծ բացում և օրերով մնում է և լուսավորություն չեն դնում: Վերջին օրինակը Ամիրյան փողոցում է: Ամեն անգամ պատճառաբանություն լինում է, բայց այսպիսի հարցերին պետք է ավելի լուրջ մոտենալ: Անթույլատրելի է քաղաքի մեջտեղում բացվում են փոսեր ընդամենը ժապավենով փակում և տևում է օրեր: Ուզում եմ կոչ անել, խնդրել Էլեկտրական ցանցերի տնօրինությանը այդ հարցերին խիստ մոտենալ: Սա կազմակերպչական հարց է պետք է հստակ սահմանել կանոններ»,- ասել է նա:
Քաղաքապետ Հայկ Մարությանը նշեց, որ հարցը պարզ է թվում, բայց երբ ցանկանում ես իրագործել՝ բարդ է. «Պետք է վերահսկելու համար օրենսդրական բազա ունենալ: Մարդուն ասում ես այսպես արա, չի անում»:
Քաղաքապետը նշեց, որ իրեն դուր չի գալիս նաև մայթեզրերի կահավորումը, հատկապես՝ եզրաքարերը: «Օրինակ՝ Մերգելյանից իջնում էի մետրո «Բարեկամություն»: Խայտառակ վիճակ է. ավազը տեղափոխվել է փողոցի մեջտեղ, «շեբենը» տեղափոխվել է մի այլ տեղ, քաոս, չկան արգելափակող նշաններ: Իմ կողմից Կամո Արեյանին հանձնարարական է եղել, այս պրոցեսը ոնց պետք է լինի: Իմ արձակուրդի ժամանակ եվրոպական քաղաքներ եմ գնացել և նկարել եմ ոնց են կահավորում այնտեղ և տրամադրել եմ»:










