Սաակաշվիլին պատմել է, թե ինչպես է նախագահ եղած ժամանակ Թրամփի հետ Վրաստանում գիշերային ակումբներ այցելել ու ցատկել շատրվանների վրայով

05:43 • 24.06.20

Վրաստանի նախկին նախագահ, Օդեսսայի նախկին նահանգապետ, այժմ Ուկրաինայի բարեփոխումների ազգային խորհրդի գործադիր կոմիտեի նախագահ Միխեիլ Սաակաշվիլին պատմել է, թե ինչպես է նախագահ եղած ժամանակ Վրաստանում Դոնալդ Թրամփին հյուրընկալել և նրա հետ գիշերային ակումբներ այցելել, հայտնում է РИА Новости-ն:

Սաակաշվիլին պատմել է, որ նախագահ եղած տարիներին Վրաստանում բազմաթիվ արտասահմանյան հյուրեր է ընդունել, այդ թվում՝ Հիլարի Քլինթոնին, Ջոն Մքքեյնին և Դոնալդ Թրամփին: «Թրամփն էլ է Վրաստանում եղել, իրար հետ ոտքով էինք զբոսնում, ես նրան իմ էլեկտրամոբիլով պտտում էի քաղաքով մինչև առավոտյան ժամը 7-ը: Գիշերային 2 ակումբում էլ ենք եղել: Շատրվանների վրայով էլ ենք ցատկել»,-մանրամասնել է Սաակաշվիլին Դմիտրի Գորդոնի վարած յութուբյան հաղորդման ժամանակ:

Սաակաշվիլին հեռացել է Վրաստանից 2013թ-ին, որտեղ նրա նկատմամբ մի քանի քրեական գործեր էին հարուցվել, և հեռակա կարգով նրան մի քանի տարվա ազատազրկման են դատապարտել: 2015թ-ի գարնանը հանգրվանում է Ուկրաինայում, որի արդեն նախկին նախագահ Պետրո Պորոշենկոն նրան նշանակում է Օդեսսայի նահանգապետ, սակայն 2016թ-ի նոյեմբերին անարդյունավետ աշխատանքի հիմնավորմամբ հեռացնում պաշտոնից, իսկ 2017թ-ի հուլիսի վերջին զրկում Ուկրաինայի քաղաքացիությունից: 2018թ-ի փետրվարին Ուկրաինայի իշխանությունները Սաակաշվիլիին արտաքսել էին Լեհաստան, իսկ նոր նախագահ Վլադիմիր Զելենսկին 2019թ-ի մայիսին վերականգնեց նրա քաղաքացիությունը, որից հետո Սաակաշվիլին վերադարձավ Ուկրաինա: