«Աթենքը չի կարող մեզ հրամաններ տալ». Չավուշօղլուն հայտարարել է, որ Սուրբ Սոֆիայի տաճարը մզկիթի վերածելու հարցը թուրք ժողովրդի որոշելիքն է

10:45 • 24.06.20

Թուրքիայի արտգործնախարար Մևլութ Չավուշօղլուն գերմանական Süddeutsche Zeitung պարբերականին տված հարցազրույցի ժամանակ հայտարարել է, որ Սուրբ Սոֆիայի տաճարը մզկիթի վերածելու հարցը պետք է որոշի թուրք ժողովուրդը: Այս մասին տեղեկացնում է «Անադոլու» գործակալությունը:

«Դա ինքնիշխանության հարց է: Աթենքը չի կարող մեզ հրամաններ տալ, մենք էլ այնպիսի բան չենք անի, որի պատասխանը չունենք»,-հայտարարել է Չավուշօղլուն:

Նա նշել է, որ ինքը զարմացած է այդ հարցով Հունաստանում տեղի ունեցող բողոքի ակցիաներից:

«Հույներն այնպես են միջամտում, կարծես Կոնստանդնուպոլիսն ու Սուրբ Սոֆիայի տաճարն իրենց տարածքում են գտնվում»,-նշել է Թուրքիայի արտգործնախարարը:

Չավուշօղլուն հիշեցրել է, որ Սուրբ Սոֆիայի տաճարը մզկիթ էր դարձել դեռևս 1453 թվականին` սուլթան Մեհմեդ Նվաճողի կամքով:

Ինչպես ավելի վաղ տեղեկացրել էր Tert.am-ը, Թուրքիայի նախագահ Ռեջեփ Թայիփ Էրդողանն օգնականներին հանձնարարել է Սուրբ Սոֆիայի տաճարը թանգարանից մզկիթի կարգավիճակի վերափոխելու մասին բազմակողմանի ուսումնասիրություն կատարել:

Սուրբ Սոֆիայի տաճարը բյուզանդական ճարտարապետության հուշակոթող է: Այն կառուցվել է 532-537 թվականներին ՝ Հուստինիանոս կայսեր կողմից, որը որոշել էր այս տաճարով հավերժացնել Կոստանդնուպոլսի փառքը:

1453-ին Բյուզանդական կայսրության անկումից հետո տաճարը վերածվել է մզկիթի: 1935-ին, Թուրքիայի կառավարության որոշմամբ, որը ստորագրվել է ժամանակակից թուրքական պետության հիմնադիր Քեմալ Աթաթուրքի կողմից, տաճարը դարձել է թանգարան, կառույցի պատերը մաքրվել են որմնանկարներից և խճանկարներից: 1985-ին տաճարն ընդգրկվել է ՅՈՒՆԵՍԿՕ-ի Համաշխարհային ժառանգության ցանկում: